Bunyodkor Minskda Belarus klubini mag'lub etdi

Aytish kerak, ertalabki mashg'ulotlar bilan boshlandi. Aniqrog'i, futbolchilar «trenajer zali»da jismoniy yuklamalar olishdi. Garchi 5 soatdan keyin o'rtoqlik o'yini bo'lsa-da, murabbiylar shtabi o'yinchilarga jismoniy yuklamalar berishdan cho'chishmadi. Ahamiyatlisi, nonushtadan keyin o'tkazilgan mashg'ulotlarda jismoniy yuklamalar olgan yigitlar tushlikdan so'ng bo'lib o'tgan o'rtoqlik o'yinida raqibga hech qaysi jihatdan yutqazgani yo'q. Aksincha, uchrashuvning aksar qismida mezbonlarga nisbatan faol va mazmunli o'tkazishdi. O'yinni tashkil qilish borasida «Smolevichi»dan ustunlik ko'rindi. SHunchaki, Belorus chempionatining 1-ligasida peshqadamlik qilayotgan maydon egalari o'z uyida yutqazishni xohlamagani sababli 90 daqiqa maydonda faollik ko'rsatdi. Takidlaganimizdek, sifat borasida bizning yigitlar ustunlik qilishdi.

O'yin taqdirini birgina gol hal qildi. Ikkinchi bo'limda chap qanotdan tashkil qilingan hujum havodan amalga oshirilgan to'p uzatish orqali o'ng qanotga ko'chdi. To'pni qabul qilib olgan Dilshod Ahmadaliev bir harakat bilan himoyachini chetga «surib qo'yib», ikkinchi harakatda darvozani erlatib nishonga oldi. Vadim Abramov ikkinchi qirq besh daqiqalikda tarkibni deyarli o'zgartirdi. Mezbonlar esa, birinchi bo'limning o'zidan keyinoq tarkibni yangilashdi.

O'RTOQLIK UCHRASHUVI
SMOLEVICHI – BUNYODKOR – 0:1 (0:0)
«Smolevichi»: Aleksey CHernix, Ivan Vasilenok, Eduard Jevrenov, Igor Zayac, Vladislav Muhamedov, Aleksandr Krasnov, Dmitriy SHHegrikovich, Anatoliy Makarov, Artyom Fedyanin, Dmitriy Gomza, Evgeniy Barsukov.
«Bunyodkor»: Murodjon Zuhurov (Abdumavlon Abdujalilov, 46), Dilshod Ahmadaliev (Muhammadodil Qahramonov, 72), Anvar G'ofurov (Ulug'bek Abdullaev, 78), Abdulla Abdullaev, Sanjar Qodirqulov, Lutfulla To'raev, Xurshid G'iyosov (Valeriy Akopov, 72), Suhrob Izzatov (Boburbek Farhodov, 72), Nurillo To'xtasinov (Javohir Qahramonov, 62), Jasurbek Jaloliddinov (Sanjar Rixsiboev, 46), Vladislav Nuriev (Mirjahon Mirahmadov, 46; Farrux Ikromov, 83).
Gol: Dilshod Ahmadaliev, 64 – 0:1.