Bugun Toshkent derbisi. "Paxtakor" - "Lokomotiv"

Toshkent derbisi maqomiga ega markaziy o'yinni Ravshan Ermatov boshchiligidagi hakamlar brigadasi boshqarib boradi.

Oliy liga. 24-tur.
"Paxtakor" - "Lokomotiv"
Boshlanish vaqti - 18:30.

Turnir jadvalidagi o'rni: "Paxtakor" 6-o'rinda (38 ochko), "Lokomotiv" 1-o'rinda (56 ochko).
Ochkolar orasidagi farq - 18 ochko.

Tarif: Bu o'yinga ortiqcha tarifning hojati bo'lmasa kerak. Bir so'z bilan aytganda poytaxt derbisi. Amaldagi chempion bilan chempionlikka harakat qilayotgan jamoaning o'zaro to'qnashuvi. Bugun "Paxtakor" stadionida qiziqarli bahs kechishi kutilmoqda. Ikkala jamoa ham o'tgan turni ikki xil o'tkazdi. "Paxtakor" safarda "Navbahor"ni mag'lub etib qaytgan bo'lsa, "Lokomotiv" o'z maydonida "Obod"ni enga olmadi.  

Fakt: Ikkinchi davrada sakkizta o'yinda maydonga tushgan "Paxtakor" dastlab ketma-ket to'rt uchrashuvda g'alaba qozona olmadi. Keyingi to'rtta o'yinda esa uch bor zafar quchib, bir marta yutqazib qo'ydi. Umuman olganda, jamoa o'z maydonida 11ta uchrashuv o'tkazib, shundan sakkiztasida g'alaba qozongan. Ikki bor durang o'ynab, bir marta mag'lub bo'lgan. "Paxtakor" o'z maydonida 10-tur bahsida "Neftchi"ga 1:2 hisobida imkoniyatni boy bergan.

Fakt: "Lokomotiv" ikkinchi davrada bitta kam o'yin o'tkazgan. CHunki "Mashal" bilan bo'ladigan uchrashuv oktyabr oyiga qoldirilgan. "Lokomotiv" ikkinchi davrada besh marta g'alaba qozondi va ikki bor durang qayd etdi. SHu paytgacha 10ta o'yinni safarda o'tkazgan "teairyo'lchilar" shundan ettitasida g'olib chiqishgan. Uch bor durang o'ynalgan bo'lsa, "Lokomotiv" hali mag'lub bo'lmagan.

Eslatma: "Lokomotiv" stadionida kechgan birinchi davra bellashuvida mezbonlar 1:0 hisobida g'g'alabaga erishishgan. Yagona gol Temurxo'ja Abduxoliqov tomonidan kiritilgan. Kecha bo'lib o'tgan Yoshlar ligasi bahsi esa 1:1 hisobida yakun topdi.