Bugun katta futbol. "Qo'qon-1912" - "Lokomotiv"

Bunda chempionlik uchun kurashayotgan "Lokomotiv" safarda "Qo'qon-1912" mehmoni bo'ladi.

Agar bugun "Loko" g'alaba qozongudek bo'lsa turnir jadvalida yana birinchi o'ringa ko'tarilib oladi. Hozircha "Bunyodkor" 26 ochko bilan birinchi, "Loko" esa 25 ochko bilan ikkinchi o'rinda bormoqda. Bugungi raqibimiz "Qo'qon-1912" oliy ligada qolish uchun harakat qilmoqda.

Oliy liga. 10-tur. 30 may.
"Qo'qon-1912" - "Lokomotiv"

Boshlanish vaqti: 17:30
Bosh hakam: SHerzod Qosimov

Turnir jadvalidagi o'rni: "Qo'qon-1912" 15-o'rin (6 ochko), "Lokomotiv" 2-o'rin (25 ochko)
Ochkolar orasidagi farq: 19

Tarif: Aytib o'tganimizdek, chempionlik uchun kurashayotgan va elitada jon saqlash uchun harakat qilayotgan jamoalar bahsi. Uchrashuv qiziq kechishini taxmin qilish qiyin emas. O'tgan yil "Lokomotiv"ning chempionlikdan mahrum bo'limshiga qaysidir manoda Qo'qonda kechgan o'yin ham sabab bo'lgandi. O'shanda "temiryo'lchilar" 2:0 hisobida oldinda borayotib, yakunda durang o'ynashgandi. Bugungi bellashuv qanday kechishini esa vaqt ko'rsatadi.
 
Fakt:"Qo'qon-1912" hisobida atigi ikkita g'alaba bor va ikkalasi ham uydagi uchrashuvda qayd etilgan. Jamoa o'z maydonida "Obod" va "Andijon"ni mag'lub etgan. SHundan keyin qo'qonliklar qatorasiga oltita bellashuvda imkoniyatni boy berishdi. Jamoa o'z maydonidagi oxirgi uchta o'yinda faqat yutqazdi. "Lokomotiv" esa safarda mag'lubiyat nimaligini bilmay kelmoqda. Jamoa bungacha safarda beshta uchrashuvda maydonga tushib, to'rttasida g'alaba qozondi va bir bor durang qayd etdi. Bundan tashqari, "Loko" 23 gol bilan oliy ligada eng ko'p to'p kiritgan jamoa bo'lib turibdi.

Eslatma: Kecha bo'lib o'tgan "Qo'qon-1912" hamda "Lokomotiv" o'rinbosarlari ishtirokidagi Yoshlar ligasi bahsida "lokochilar" 2:0 hisobida zafar quchishdi. Bunda Quvondiq Ro'ziev bilan Bobir Tillaboev gol muallifi bo'lishdi.