Bugun futbol. "Qo'qon-1912" - "Metallurg"

"Qo'qon-1912" o'z maydonida "Metallurg"ni qabul qiladi. Turnir jadvalida ushbu jamoalar yonma-yon o'rinlarni egallab turishibdi. "Metallurg" 24 ochko bilan 8-o'rinda borayotgan bo'lsa, "Qo'qon-1912" 21 ochko to'plagan holda 9-o'rinda boryapti. "Metallurg"da to'plar nisbati 22-22, yani nol. "Qo'qon-1912" esa gol urishdan ko'ra ko'proq o'tkazib yuborgan, 24-35 (-11). 

Bugungi bellashuv qo'qonliklar uchun uydagi 10-bahs bo'ladi. Jamoa shu paytgacha uchtadan g'alaba, durang va mag'lubiyat qayd etgan. "Qo'qon-1912" uy uchrashuvlarida 12 ochko jamg'argan. 

"Metallurg" uchun bugungi bahs safardagi 11-chisi bo'ladi. Avvalgi 10ta o'yinning faqat bittasida g'alaba qozongan "Metallurg" 5 marta durang o'ynab, to'rtta bellashuvda imkloniyatni boy bergan. Bekobodliklar safarda faqat "Nasaf"ni mag'lub etishning uddasidan chiqishgan. 

Ikkinchi davrani "Qo'qon-1912" juda yaxshi o'tkazyapti. Xususan jamoa qatorasiga 5 o'yindan beri yutqazgani yo'q: to'rt g'alaba va bir durang. Buning ustiga qo'qonliklar ketma-ket to'rtta uchrashuvni uyda o'tkazishdi, bugungisi beshinchisi bo'ladi. 

"Metallurg" esa ikkinchi davrani o'z imkoniyati darajasida o'tkazyapti. Bu jamoa oxirgi uchta o'yinda bittadan g'alaba, mag'lubiyat va durang qayd etdi. 

Bekobodda kechgan birinchi davra uchrashuvida "Metallurg" 3:1 hisobida zafar quchgandi. Qo'qondagi oxirgi bahsda esa o'tgan yil maydon egalari 2:1 hisobidagi g'alabani tantana qilishgan. 

Qo'qonda kechgan oxirgi 5 o'yin 

2018. "Qo'qon-1912" - "Metallurg" 2:1 

2017. "Qo'qon-1912" - "Metallurg" 3:0

2016. "Qo'qon-1912" - "Metallurg" 2:1 

2015. "Qo'qon-1912" - "Metallurg" 2:1 

2003. "Qo'qon-1912" - "Metallurg" 4:0  

Ko'rib turganingizdek, Qo'qonda bo'lib o'tgan oxirgi besh uchrashuvning hammasida mezbonlar zafar quchgan. "Metallurg" hech bir bahsda bittadan ko'p to'p kirita olmagan. Ikki bor yirik hisob qayd etilgan va uch marta 2:1 hisobi bilan yakun topgan.