Turnir jadvalida "Buxoro" 12 ochko bilan to'rtinchi o'rinni egallab turibdi. AGMK hisobida 8 ochko bo'lib, ular 6-o'rinda bormoqda. "Buxoro" bungacha o'tkazilgan uydagi hamma uchrashuvlarda g'alaba qozondi. Buxoroliklar uyda "Qo'qon-1912", "So'g'diyona" va "Paxtakor"dan ustun kelishdi.
Qizig'i shundaki, "Buxoro" o'z maydonida hali gol o'tkazgani yo'q. To'plar nisbati 5-0. Jamoa oxirgi ikkita o'yinini 1:0 hisobidagi g'alaba bilan yakunladi.
Bilasizmi? AGMK oxirgi uch o'yindan beri mag'lub bo'lmayapti. Viktor Kumikov shogirdlari uyda "Lokomotiv" va safarda "Neftchi"ni mag'lub etishdi. Shuningdek, "Qo'qon-1912" bilan 0:0 o'ynashdi.
Bugun Buxoroda qiziqarli bahs kechishi kutilmoqda. "Buxoro" o'z maydonida hujumkor o'yin ko'rsatishi tabiiy. Ammo AGMK ham yaxshi tarkibga ega va ularda bo'ydor futbolchilar ko'p. Imkoniyatlar borasida teng deya olamiz.
