Bugun futbol. "Navbahor" - "Lokomotiv"

Aytish mumkinki, turning markaziy uchrashuvi bugun Namanganda "Navbahor" va "Lokomotiv" jamoalari o'rtasida kechadi. Bu o'yin "Navbahor" uchun joriy mavsumdagi ilk uy uchrashuvi bo'ladi, shu bois o'yinga qiziqish juda katta. Soat 20:00da boshladigan bahsda stadion to'lishi kutilmoqda.

Bizga malum bo'lishicha, uchrashuv uchun chiqarilgan chiptalar allaqachon sotib bo'lingan. "Navbahor" avvalgi ikkita turni safarda o'tkazdi va "Metallurg" bilan durang o'ynagan bo'lsa, AGMKni Olmaliqda 2:1 hisobida mag'lub etdi. SHu o'yinda Aziz Turg'unboev juda chiroyli o'yin namoyish etib berganini muxlislar yaxshi bilishadi.

"Lokomotiv" bugun O'zbekistonning amaldagi chempioni sifatida maydonga tushadi. "Temiryo'lchilar" bungacha safarda "Qizilqum"ni 3:0 hisobida mag'lub etib, uyda "Metallurg" bilan 1:1 qayd etishdi. Bundan tashqari, "Loko" OCHLda Qatarning "Al Duhayl" klubiga yutqazib qo'ydi.

"Loko"ning 1-tur uchrashuvida Ikrom Aliboev juda chiroyli gol muallifi bo'lgandi. "Navbahor" safida esa Aziz Turg'unboev AGMK darvozasini jarima to'pidan ajoyib tarzda ishg'ol qildi. Bugun har ikkala futbolchi yana o'z imkoniyatlarini ko'rsatsa ajab emas.

To'g'ri, "Lokomotiv"ning OCHLdagi ishlari yaxshi ketmayapti, lekin Superligada bu jamoadan hamma hayiqishi bor gap. Ammo "Navbahor" bugun 20 mingdan ziyod muxlis ko'z o'ngida "Loko"ga jiddiy qarshilik ko'rsatishi kutilmoqda. Nima bo'lgan taqdirda ham, biz ikkala jamoadan hujumkor va ochiq futbol kutib qolamiz.