Bugun futbol. Ikkinchi davrada hali yutmagan "Navbahor" "Andijon" mehmoni bo'ladi

Mavsum boshida yuqori o'rinlarni maqsad qilgan "Navbahor" safarda "Andijon" mehmoni bo'ladi. Vodiy derbisi bo'lgani uchun bu bahs nihoyatda qiziq kechishi kutilyapti. 

Turnir jadvalida "Andijon" 16 ochko bilan 10-o'rinni egallab turibdi. "Navbahor" esa 22 ochko to'plagan va 6-o'rinda boryapti. "Andijon"ning ikkinchi davradagi natijalari chakki emas: uchta o'yindan ikkitasida g'alaba qozonib, bir bor durang o'ynadi. Ayniqsa "Andijon"ning o'tgan tur Bekoboddan g'alaba bilan qaytishi o'ziga xos sensaciya bo'ldi. Bugun andijonliklar o'tgan turdagi g'alaba tasodif emasligini isbotlashga harakat qiladilar. 

"Navbahor" esa negadir o'zini ko'rsata olmayapti. Bu jamoa Kanchelskiy paytida ancha tomoshabop futbol namoyish etardi. Lekin yangi murabbiy kelganidan beri "Navbahor" ikkinchi davrada hali g'alaba nashidasini surgani yo'q. Jamoa ikki bor mag'lubiyatga uchrab, bir o'yinda durang qayd etdi. 

Bugungi bahsda tomonlarning imkoniyati teng baholanmoqda. Albatta, "Andijon" o'z uyida o'ynaydi va uyda devorlar ham yordam beradi degan gap bekorga aytilmagan. Lekin "Navbahor" safarda qanday to'p tepish kerakligini biladi. Qolaversa bu jamoa faqat uch ochkoni ko'zlab harakat qilsa kerak. 

18:00. «Andijon» - «Navbahor»

Hakamlar: Viktor Serazetdinov, Timur Galeev, Ravil SHoyaxmetov, Olim To'ychiboev.

Nazoratchi: Noil Lutfullin

Komissar: Sardor Qudratullaev