Bugun futbol. "Buxoro" - "Paxtakor"

"Paxtakor" safarda "Buxoro" mehmoni bo'ladi. Turnir jadvalida "Paxtakor" ikkinchi o'rinni egallab turibdi. "Buxoro" esa yuqori oltilikning 6-pog'onasidan muqim joy olgan.

Bugungi o'yinda imkoniyat ko'proq "Paxtakor" tomonidagidek. Negaki jamoa safarda yaxshi o'yin ko'rsatyapti. Qolaversa, "Buxoro" hozir muammolar girdobiga tushib qolgan. "Buxoro" birinchi bosqichda yaxshi o'yin ko'rsatib kelayotgandi, ammo ikkinchi davra boshlanganidan beri faqat bitta o'yinda g'alaba qozonganini hisobga olmasak, beshta uchrashuvda mag'lub bo'ldi.

Buxoroda bo'lib o'tgan birinchi bosqich bellashuvida maydon egalari zafar quchishgandi. Esingizda bo'lsa, o'shanda "Paxtakor" hujumchisi Ismoil Gonsalvesh penaltidan to'p kirita olmagan. "Paxtakor" bungacha safarda ketma-ket ikkita o'yinda g'alabaga erishdi. Jamoa "Metallurg"ni 3:0, "Bunyodkor"ni esa 2:0 hisobida mag'lub etdi. 

"Buxoro" bugungi raqibiga jiddiy qarshilik ko'rsata oladimi? Bir narsa deyish qiyin. Bir tomondan buxoroliklarga ham ochko kerak, lekin ikkinchi tomondan jamoadagi kayfiyatni zo'r deb bo'lmaydi. "Buxoro" o'tgan tur o'z maydonida "Bunyodkor"ga yutqazib qo'ydi. Bungacha "Lokomotiv"ga ham imkoniyatni boy bergandi. Bugun nima bo'lishini esa o'yin davomida bilib olamiz.