Bu safargi zarbof to'n Kovshovga bo'ldi

“Burgutlar”ning kelasi yil ham oliy ligada ishtirok etishi rasman aniq bo'ldi. Bu esa tabiiyki mahalliy ishqibozlarni xursand qilmasdan qolmaydi. Andijonda shunday jonkuyar ishqibozlar borki, ular jamoasining muvaffaqiyati uchun ko'p narsadan voz kechishga ham tayyor. Garchi jamoa ayrim vaqtlarda autsayderlar qatoriga tushib qolganida ham andijonlik muxlislar suyukli klubini yolg'izlatib qo'ymadi va har bir uchrashuvda qizg'in-qo'llab quvatlab turdi.

“Yutqazsa ham so'kib-so'kib, kiraveramiz yana” qabilida fikr bildiradiganlarni ham ko'p uchratamiz. Xullas andijonliklar birinchi davradan so'ng elitada qolishni o'ylab qolishdi va buning uchun qanday bo'lmasin vaziyatni ijobiy tomonga o'zgartirishga urindi. Eng avvalo shuni aytib o'tishni istardikki, davralar oralig'ida qilingan transferlar to'la-to'kis o'zini oqladi. Tursunboy Xusanov va Iqbol Boboxonov ikkinchi davrada himoyada katta yordam berdi va deyarli barcha uchrashuvlarda almashtirishlarsiz o'ynadi.

Yarim himoyada esa Abdulloh Olimovni ham ko'rsatish mumkin. Iqtidorli futbolchi maydon markazi va qanotlarda o'ynab, jamoasining muvaffaqiyatlariga katta hissa qo'shdi. SHuningdek Anvar Berdievning ham o'tishi eng omadlilaridan biri bo'ldi desak mubolag'a bo'lmaydi. Tajribali hujumchi ikkinchi davraning dastlabki o'yinlarida ayrim sabablarga ko'ra jamoaga yordam bera olmadi. Keyinchalik esa hammasi iziga tushdi va Berdiev ketma-ket gollari urib, “Andijon”ning muvaffaqiyatlariga sezilarli darajada ulush qo'sha oldi. 

Berdievning gollaridan rohatlangan andijonlik ashaddiy muxlis Rustamjon aka “So'g'diyona”ga qarshi bahsdan oldin Anvarga zarbof to'n kiydirgan xolda, unga xurmat extirom ko'rsatdi. Bu esa tajribali futbolchining yanada to'lqinlantirib yuborgan bo'lsa ajab emas. Negaki bu kabi rag'batlar har qanday o'yinchiga ruhan o'z tasirini o'tkazadi.
Edgar Gessdan so'ng vaqtinchalik bosh murabbiylik vazifasini bajarishga kirishgan Sergey Kovshov yordamchilari Nozim Mullaoxunov va Vitaliy Legay ko'magi asosida jamoani eng avvalo ruhiy “o'radan” olib chiqib keta oldi. Buning oqibatida natija ham ijobiy tomonga o'zgara boshladi.

Ayniqsa ketma-ket uchta g'alabadan so'ng “burgutlar”ning turnir jadvalidagi ahvoli keskin ravishda o'zgardi va muxlislar biroz bo'lsada havotirni yo'qotdi. Andijonlik ishqibozlarni ayniqsa Farg'onadagi g'alaba juda ham xursand qilib yubordi. Ashaddiy ishqiboz Rustamjon aka kecha “Dinamo”ga qarshi bahs oldidan stadionga yana o'z sovg'asi bilan tashrif buyurdi. Bu safar u endi Kovshovga minnatdorchilik bildirgan xolda, zarbof to'nni aynan Sergey Gennadevichga kiydirdi. Muxlislar ishonchini oqlagani uchun murabbiyga tashakkur izhor ayladi. 

Darvoqe, kechagi o'yin yakuniga etib borayotganida, aniqrog'i hisob tenglashgach, stadionga kelgan ashaddiy ishqibozlar “Dinamo”ni olib qoldik” deya jo'r bo'lib hayqirdi...

Islombek Rustambekov.