Berdiyor Mamurov: "Muxlislarimiz g'alablarni sog'inib qolishgandi"

- Berdiyor aka, "Zomin" jamoasi so'ngi pog'onalarni egallab turganiga qaramasdan bugun safarda "Istiqlol"ni mag'lub etishning uddasidan chiqdi. O'yin haqida fikrlaringiz...

- Xabaringlar bor, jamoamiz bugunga qadar so'ngi pog'onani egallab turgandi. Bizda ham boshqa professional klublardan sharoitlarimiz kam emas. Maydonlarimiz yaxshi, ichki muhitimiz joyida, xomiylarimiz muntazam bizni qo'llab-quvvatlab kelishmoqda. Aslida "Zomin" so'ngi o'rinlarda yuradigan jamoa emas. Tarkibimizda bir qator mahoratli futbolchilar bor.

Pandemiya tufayli jamoamiz har o'yindan oldin tibbiy tekshiruvdan o'tadi. Obektiv va subektiv sabablarga ko'ra o'yinlardan oldin tarkibimizda yo'qotishlarga duch kelmoqdamiz. Ularning o'rnini to'ldirish uchun yosh futbolchilardan foydalanishga to'g'ri kelmoqda.

Endilikda hammasi joyiga tushdi, "Xorazm" bilan o'yinga ham to'liq tarkib bilan bordik. Mana bugungi o'yinga ham ayrim futbolchilarni aytmasa deyarli to'liq shakllangan xolda etib keldik. Bugungi o'yinga klubimiz rahbarlari ham kelib bizni qo'llab-quvvatlab turishdi. O'yindan oldin bizdan bugun yuta olasizlarmi deb so'rashdi, biz albatta yutamiz deb javob berdik. Mana rahbarlarimiz bizga yaxshi sharoitlarni yaratib berishdi, natijamiz ham ko'ngildagidek bo'ldi. Muxlislarimiz g'alabalarimizni sog'inib qolishgandi. Viloyatimiz hokimi, shuningdek tumanimiz hokimi oxirgi o'rinda bizga yarashmasligimizni aytib o'tishgandi. Bularning hammasi jamoamiz yigitlarini ruhlantirdi va g'alabalarga erishmoqdamiz.

- Ayni damda quyi to'rtlikda "Istiqlol" jamoasi ochkolar bo'yicha ilgarilab ketgan. Endilikda asosiy kurash "Zomin", "Oq-tepa" va "Xorazm" jamoalari o'rtasida kechadi. Nima deb o'ylaysiz, jamoangiz navbatdagi turda "Oq-tepa" bilan kechadigan o'yinda ham bugungidek ishtiyoq bilan o'ynay oladimi?

- Nasib bo'lsa bugungi kabi o'yin namoyish etamiz. CHunki bugun "Istiqlol"ga qarshi bahsdan so'ng jamoamiz qaytishi kerak edi. Lekin bugun bizga Farg'onada qolishimizni, yaxshi hordiq chiqarib ertaga Toshkentga jo'nashimizni aytishdi. Xomiylarimiz jamoa "Oq-tepa" maydonida mashg'ulotlar o'tkazib, u erdagi muhitga moslashishi bo'yicha sharoitlar yaratib beradigan bo'lishdi. Uyga qaytish yo'q, bizga shuncha imkoniyat yaratib berishmoqdami, biz ham munosib ravishda g'alabalarimiz bilan javob berishimiz kerak.