Baxtiyor Ashurmatov: "Ulug'bek Baqoevni o'yin oxirida maydonga chiqarishga majbur bo'ldim"

"O'yindan ikkin kun oldin jamoa muxlislari bilan uchrashgandik. Ular ko'plab yaxshi niyatlar bildirishgandi. Muxlislarimiz jamoa g'alaba qozonishini istashgandi. Ularning tilaklarini va faqat g'alaba kerakligini yigitlarga etkazgandim. SHogirdlarim keragidan ortiq ruhlanib ketishdi. SHuning uchun his-xayajon sezilib turdi va o'yin biz istagan darajada chiroyli bo'lmadi. Uchrashuv asabiy kechdi. Muxlislarimizning oxirigacha bizni qo'llab-quvvatlashlari natijasida o'zimiz uchun kerakli bo'lgan natijani qo'lga kiritdik. "Neftchi" bejizga etakchilar qatorida yurmaganini isbotladi. Farg'onaliklar bugun chiroylik futbol namoyish etishdi, xavfli vaziyatlar sodir etishdi. SHuning uchun ikkala jamoa azolariga tashakkur bildiraman.

Ulug'bek Baqoevni o'yin oxirida maydonga chiqarishga majbur bo'ldim. Bu qaysidir manoda tavakkalchilik bo'ldi. Ulug'bek ishonchimizni oqlab, kerakli gol muallifiga aylandi. Baqoev jamoadoshlarini ruhlantirishi va ularda jangovorlikni kuchaytirishi kutilgandi. Bu o'zgarishimiz to'g'ri bo'lib chiqdi. Birinchi davraga nisbatan hozir "Navbahor" axilroq. Jamoa axilligi evaziga kerakli ochkolarni qo'lga kiritmoqda deb o'ylayman. Davron Isoqov bugun maydonga chiqishga tayyor edi. Ammo, o'yindan avval "Neftchi" beshta himoyachi bilan o'ynashini bilardik. SHuning uchun yakkakurashlarda g'olib chiqa oladigan bo'ydor futbolchilar xizmatidan foydalanishni lozim topdik. SHu sababli Davron bugun uchrashuv qaydnomasiga kiritilmadi. Keyingi o'yinlarda bizga Isoqovning foydasi tegadi deb o'ylayman. "Neftchi"ning "SHo'rtan"ga qarshi G'uzorda o'tgan o'yinini o'yingohdan kuzatib bordim. Ularning "Lokomotiv" bilan kechgan o'yinini ham ko'rib chiqdik. Raqibimiz kuchli va kuchsiz taraflarini bilardik. Akmal Xolmatovning qanday ajoyib xolatda ekanidan xabarimiz bor edi. SHunga qaramay darvozabonimiz Akmal Ortiqov ishonchli o'yin ko'rsatdi. Teng kurashlar ostida kechgan o'yinda omad biz tomonimizda bo'ldi".