Baxtiyor Ashurmatov: "CHempionatimiz ikkiga bo'lingandek!"

-   “Nasaf” o'z maydonida chiroyli va ishonchli o'yin namoyish qilishini bilganligim sababli bugun himoyaviy taktika tanlashga majbur edim. Yigitlar oxirigacha kurashdi, ularga etirozim yo'q. Bugungidek o'yinlar chempionatni bezaydi, deb ayta olaman.

-   Bugun ko'p bora futbolchilaringiz o'yinni cho'zishga harakat qilishdi. O'zingiz shunday ko'rsatma berganmidingiz?

-   Men hech qachon shogirdlarimga yotvolib o'yinni cho'zinglar, deb ko'rsatma bermayman. Bugungi havo dim, qolaversa futbolchilarimiz “Nasaf”ning shiddatli hujumlariga dosh bera olishmadi. Masalan, Azim Ahmedovni oladigan bo'lsak, u terma jamoadan toliqib qaytgandi, maydonda o'zini noxush his qildi.

-  Kachurni boshlang'ich tarkibda ko'rmadik?

-  U “Neftchi” bilan uchrashuvda kichik jarohat olgandi.

-  Bugungi hakamlik haqida fikringiz?

-   Men “Neftchi” bilan o'yinda ikkinchi bo'limni tribunada o'tkazdim. Bu men uchun juda og'ir bo'ldi. SHu sababli bugun har qanday vaziyatda ham o'zimni bosishga harakat qildim. Men hakamlar haqida hech narsa demayman. Ularni nazorat qiluvchi tashkilot bor. Hakamlarga xudodan insof so'rayman. Agar hakamlar adolatli bo'lishsa, adolatli hakamlik o'zbek futbolining o'sishida asosiy omil bo'lardi.

-  Homiylarning yordami to'g'risida fikringiz?

-  Homiyimiz jamoaga beminnat yordamini ayamayapti. 2012-13 yillardagi jamoa qarzlaridan to'la qutildik. Ularga katta rahmat aytmoqchiman. Qolaversa, futbolchilarimizning jamoaga nisbatan ishonchi ortmoqda. Futbolchilar bilan shartnomalarimiz shunchaki qog'ozda qolib ketayotgani yo'q.

-  Jamoa oldiga qanday vazifa qo'yilgan?

-   CHempionatimiz ikkiga bo'lingandek, go'yo! Dastlabki to'rt jamoa alohida chempionat, qolgan jamoalar esa boshqa bir chempionatdek! 5-6 o'rin uchun kurashamiz. Eng muhimi jamoaga fundament qo'yilmoqda. Agar muxlislar va homiyimizning ishonchini yo'qotmasak, kelgusi mavsumdan yuqoriroq marralarni ko'zlaymiz.

Olim TOLIPOV yozib oldi.