Baxtiyor Ashurmatov: "Bu uchrashuvda menga biroz noqulay bo'ldi"

Bellashuvdan so'ng O'zbekiston terma jamoasi yordamchi murabbiyi, shu bilan birga "Navbahor" bosh murabbiyi hisoblangan Baxtiyor Ashurmatovni suhbatga chorladik.

- Ochig'i, bu uchrashuvda menga biroz noqulay bo'ldi. CHunki, har ikkala jamoada ham faoliyat olib boraman. SHuning uchun ham 90 daqiqa davomida maydonda hech kim jarohat olmasligiga umid qilib o'tirdim. Agar “Navbahor” boshqa jamoa bilan bellashganda yigitlarga yakka kurashlarda umuman yutqazmaslik uchun “qattiqroq” o'ynashlarini talab qilgan bo'lardim.

Bu “Navbahor” uchun kerakli bahs bo'ldi. Mag'lubiyatga qandaydir vaziyatlarni baxona qilib keltirmoqchi emasman. To'g'ri, ikkinchi bo'limda butunlay boshqa tarkib tushgani ham o'yinga biroz tasir qildi. Terma jamoa bilan o'rtoqlik o'yinida “Navbahor” tarkibida jami bo'lib 23 nafar futbolchi maydonga tushdi, legionerlarning harakatlarini ham kuzatdik.

Umumiy olganda o'yin tomoshabop bo'ldi, stadionga kelganlar ham zerikib qolishmadi. Birinchi bo'lim teng kurashlar ostida kechdi, ikkinchi bo'lim esa terma jamoa ustunligida o'tdi. Terma jamoada o'z yoshidagi eng yaxshilar saralab olinganini ham unutmaslik lozim.

Terma jamoa murabbiylaridan biri sifatida g'alabadan hursand bo'lgan bo'lsam, “Navbahor” bosh murabbiyi sifatida jamoam mag'lubiyatidan kayfiyatim tushib ketdi. Bu o'yin jamoamiz uchun hali ko'p ish qilishimiz va o'z ustimizda to'xtovsiz ishlashimiz kerakligini ko'rsatib berdi, - deya o'z fikrlarini bildirib o'tdi Ashurmatov.

- “Navbahor” tarkibida harakat qilgan ukrainalik ikki legioner Kablash hamda Kachurning klubdagi kelajagi nima bo'ladi?
- Rostini aytsam menda Kachur yaxshiroq taassurot qoldirmoqda. Legioner hujumchi maxalliy o'yinchilarimizdan ustun bo'lishi kerak. Agentlik qiluvchi do'stlarim bir nechta xorijlik hujumchilarni tavsiya etishdi, lekin ularning narxi qimmatligi uchun ham jamoaga olib kela olmaymiz. Ikkinchi davrada katta pul sarflab, keyin qiynalib qolishni istamaymiz. Bir so'z bilan aytganda bir kun bilan yashamoqchi emasmiz. SHaxboz Erkinov jarohat olgan, Abdumalik Abdullaev esa tibbiy ko'rikdan o'ta olmadi. SHuning uchun ham hozir hujumchi izlayapmiz. Abdumalik davolanmoqda, chempionat o'yinlari boshlanishidan oldin yana bir marta tibbiy ko'rikdan o'tadi va shifokorlar ruxsat berishsa, ikkinchi davrada o'ynaydi. SHu kunlarda esa davolanayotganligi bois mashg'ulotlarda ishtirok etmayapti. Bu hujumchining ikkinchi davraning boshlanishiga tayyor bo'la olmasligini bildiradi. SHuning uchun ham ko'p ehtimol bilan legionerlardan biri olib qolamiz.

- “Navbahor” mashg'ulotlarida qatnashyapsizmi?
- Terma jamoada Mirjalol Qosimovga yordam berayotganligim uchun klub mashg'ulotlarida ishtirok eta olmayapman. CHunki, mashg'ulotlar bir vaqtda o'tkaziladi. Yordamchilarim Zoxid Nurmatov, Mustafo Bayramov va Zaxareckiylar yigitlarni ikkinchi davraga tayyorlashmoqda. Men telefon orqali ayrim ko'rsatmalarni berib borayapman.


Tolibjon Qosimov suhbatlashdi