Baklajka zavodida suvoqchilik va qorovulchilik qilgan, Ippodromda disk sotgan AGMK darvozaboni 30 yoshda!

Bugun poytaxt viloyatining AGMK jamoasi darvozaboni Akbar To'raev 30 yoshga to'ldi. Oilaviy muhit tasirida futbolni tanlagan Akbar 8 yoshida "Paxtakor" klubi futbol maktabida millionlar o'yini sir-asrorlarini o'rganishni boshlagan. Birinchi murabbiyi Baxtiyor Nuraliev. Keyinchalik "CHilonzor" jamoasiga ko'chib o'tgan. Darvozbonlikni tanlaguniga qadar barcha chiziqlarda o'ynab chiqqan. Avvaliga himoyada, keyin chap qanot yarim himoyasida o'ynagan. Hujum chizig'ida ham o'z imkoniyatini sinab ko'rgan. 

"Bir kuni o'yinga ikkala darvozabonimiz ham kelmagan, - deydi biz bilan suhbatda Akbar. - Biri kasal bo'lib qolgan, ikkinchisi esa xorijga ketib qolgan. Bu taqdirning menga bergan tuhfasi bo'lsa kerak, o'sha o'yinda murabbiyimiz meni darvozani qo'riqlashimni aytdi. Undan avval ham mashg'ulotlarda penalti tepishni mashq qilsak, darvozaga o'z xohishim bilan turardim. Ochig'i, darvozabonimizdan ko'ra, penaltini qaytarish menda o'xshardi. SHunda murabbiyimiz Prokofev Boris Andreevich meni darvozaga qo'ydi. O'sha o'yin kuchli raqibga qarshi bo'lib o'tgandi. Uchrashuv 1:1 hisobida yakunlanib, o'yin davomida bitta penaltini qaytarishga muvaffaq bo'lgandim. Uchrashuvdan so'ng darvozabon sifatida shakllana boshladim". 

Yuqorida takidlaganimizdek, Akbar oilaviy muhit sabab futbolni kasb sifatida tanladi. Uning otasi Tohir aka o'z vaqtida “Paxtakor” o'rinbosarlari tarkibida o'ynagan. Bir marotaba Bloxin to'p tepayotgan Sobiq ittifoq o'smirlar terma jamoasiga chaqirilgan. Viktor Jalilov, Vladimir Fyodorov, Mixail An kabi futbolchilar bilan bir sinfda o'qigan. 

"Dadam tizzalaridan olgan jiddiy jarohat sabab futbolni ertaga tamomlaganlar, - deya so'zini davom ettirdi kichik To'raev. - Bilasizmi, aslida ota-onam maslahatlashib meni tennisga berishgan, o'sha paytda 6 yosh edim. Bir yarim yilcha mashg'ulot o'tkazganimdan keyin, yig'lab futbolga o'tib ketganman. Tennis ham "Paxtakor" Markaziy stadionida edi, uyga qaytayotganimda "Paxtakor" futbolchilari mashg'ulot o'tkazar edilar. Inson hamma narsaga tayyor turishi kerak. Hayotda kutilmagan holatlar, voqealar bo'lib turadi. Menda ham shunday bo'lgan. 16-17 yoshimda “Paxtakor” bilan biroz muammo yuzaga kelgan. Yani, o'tish davrida jamoasiz qolib ketganman. Hech bir jamoada to'p tepa olmay qolgandim. Natijada futboldan biroz bo'lsa-da sovub, zavodda ishladi. Zangiota tumanida baklajka ishlab chiqaradigan zavodda suvoqchilik ham qilganman. Otchopar bozorida disk sotganman. Zavodda qorovulchilik ham qildim. Sababi, oilamizda moliyaviy imkoniyat zo'r emas edi. Mehnatdan qochmaganman, qochish ham kerak emas. Ishing halol bo'lsa, qilayotgan mehnatingdan uyalish ham kerak emas.

Ha, hayot yo'llari bir tekis ravon emas. Akbar aytganidek, inson hamma narsaga tayyor turishi kerak. To'raev o'smirlik davrida yuzaga kelgan qiyinchiliklarni mardonavor engib o'tib, yana katta futbolga qaytdi. "Bunyodkor"dan chaqiruv oldi. "Qaldirg'ochlar" safidagi ishonchli o'yinlari sabab milliy terma jamoaga chaqirildi. 2014 yilning 10 oktyabr kuni Bahraynga qarshi uchrashuvda mamlakat bosh jamoasidagi debyutini nishonladi. Hozirda esa u amaldagi O'zbekiston kubogi sohibi AGMK sharafini himoya qilmoqda. "Bunyodkor" safida O'zbekiston chempioni va mamlakat kubogi sohibi bo'ldi. 

Fursatdan foydalanib, Akbar To'raevni 30 yoshga to'lishi munosabati bilan saytimiz ijodkorlari va o'quvchilari nomidan muborakbod etamiz. Ustozimiz Mirzahakim To'xtamirzaev aytganlaridek, omad hech qachon Akbarni tark etmasin!