Bahrom Haydarov: "Ikkinchi bo'limda tajriba o'z so'zini aytdi"

O'yin haqida

- Jamoamiz vakillari va muxlislarimizni g'alaba bilan tabriklayman. Raqibimiz yosh futbolchilardan iborat bo'lishiga qaramasdan birinchi bo'limda juda faollik bilan harakat qilishdi. Kelajagi porloq yigitlar ekanliklari ko'rinib turibdi. Tanaffusdan so'ng bizning jamoa vakillari o'yinni kuchaytirishdi va tajriba o'z so'zini aytdi.

- Birinchi bo'limda 0:0, ikkinchi bo'limda 7 ta gol urilishi kamdan-kam uchraydigan hodisa. Buni kutganmidingiz?

- Bunaqa yirik hisob bo'lmasa ham bugun g'alaba qozonishimizga ishongan edim. Ko'p gol urishimizni kutgandim. Ikkinchi bo'limda tajriba o'z so'zini aytdi. 

Uchrashuvning birinchi bo'limda maydonga o'yin amaliyoti kam futbolchilarni tushirgandik. Ikkinchi bo'limda hozirgi kundagi asosiy tarkibimiz vakillarini o'yinga tashladik.

- Yirik hisobda qozonilgan g'alaba Superliga o'yinlari oldidan jamoaga qanday ishtiyoq beradi?

- Buning ustida ishlaymiz. Boisi, vaziyat ijobiy tomonga ham, salbiy tarafga ham ketib qolishi mumkin. Asosiy maqsadimiz guruhdan chiqish. Navbatda "Xorazm" bilan o'yin ham oson bo'lmaydi.

- Legioner futbolchi Amed Kobena bilan shartnoma bekor qilinishiga munosabatingiz?

- Biz ushbu futbolchi bilan bir oy muddatlik sinov shartnomasi imzolagandik. Bu vaqtda o'zini ko'rsata olmadi. Avvaldan jarohati bor ekan, bu mashg'ulotlar jarayonida ham pand berdi. Shu bois Kobena bilan shartnomani bekor qilishga majbur bo'ldik.