Aziz Asimov va Rahim Karimov o'z arizasiga ko'ra ishdan ketgan, Akobirxo'ja Shukurullaev, Abdurashid Xudoyberganov va Firdavs Norsafarovga qo'llangan cheklov olib tashlangan - O'FA Etika qo'mitasi

Unda O'zbekiston professional futbol ligasining 2025 yilning 9 yanvarida yuborgan 01/10-sonli xatiga asosan O'zbekiston futbol hakamlari markazi hakamlari Aziz Asimov, Rahim Karimov, Akobirxo'ja Shukurullaev, Abdurashid Xudoyberganov hamda Firdavs Norsafarovlarning sport musobaqalari natijalariga tasir o'tkazishga aloqadorligi to'g'risidagi ish ko'rib chiqildi.

O'FA Etika qo'mitasiga taqdim etilgan hujjatlarga asoslanib, qo'mita tomonidan O'zbekiston futbol hakamlari markazi sobiq hakamlari Aziz Asimov va Rahim Karimov faoliyatida yo'l qo'ygan xato va kamchiliklari uchun o'z arizalariga ko'ra hakamlik faoliyati tugatilgani, shuningdek, faoliyatida texnik xatolarga yo'l qo'ygan hakamlar Akobirxo'ja Shukurullaev, Abdurashid Xudoyberganov hamda Firdavs Norsafarov esa hakamlik faoliyatidan malum muddatga chetlashtirilganligi aniqlandi.

O'FA Maxsus inspekciyasi tomonidan nomlari yuqorida keltirilgan hakamlar bilan profilaktik va tushuntirish ishlari olib borilgan hamda ular o'z faoliyatida yo'l qo'ygan xato va kamchiliklarini to'liq tushunib etganlar. Shuningdek, kelgusida yuzaga kelishi mumkin bo'lgan bu kabi holatlarni oldini olishi bo'yicha barcha imkoniyatlarini ishga solishini bildirib o'tganlar.

Etika qo'mitasi tomonidan O'zbekiston futbol hakamlari markazi hakamlari Akobirxo'ja Shukurullaev, Abdurashid Xudoyberganov hamda Firdavs Norsafarovga nisbatan vaqtinchalik O'zbekiston futbol hakamlari markazi tomonidan Superliga, Pro liga, Birinchi liga, O'zbekiston Kubogi va Superkubogi kabi musobaqalarda faoliyat olib borishga nisbatan qo'llanilgan cheklovlar (chetlatishlar) muddati tugaganligi bois, ularning hakamlik faoliyatini qayta tiklanishi taminlanishi bo'yicha qaror chiqarildi.