Aybek Nurbaev: "Olimpik MobiUz"ni yaxshi o'rgangan edik"

"Barcha  "Jayhun" muxlislarini g'alaba bilan tabriklayman. Uch ochko suv va havodek zarur edi. So'nggi ikki o'yinlarda ko'nglimiz to'lmayotgandi. Shu bois bugun yutmasak bo'lmasdi. "Olimpik Mobiuz"ni yaxshi bilardik, shu paytgacha 3 marotaba to'qnash kelgandik. Yigitlarga g'alaba zarurligini aytgandim. Avvalgi o'yinlarni unutib boshqacha tayyorgarlik ko'rdik. Raqibni o'rganib chiqqan holda o'yinlarni tahlil qildik. O'yinga kelsak, nazorat jamoamiz tomonda bo'ldi. Raqib darvozasiga to'plar kiritildi. Gollarni kerakli vaqtda urdik. "Olimpik Mobiuz"ni yaxshi bilasizlar. Tarkibida terma jamoa futbolchilari bor. "Lokomotiv" bilan kechgan o'yinlarini tomosha qildik, har bir futbolchi o'rganildi. Raqib 2 ta golni o'z xatolarimizdan so'ng urib ketdi. Umuman olganda jamoamdan mamnunman",- deydi Aybek Nurbaev. 

- Asadulla Kutibaevni zaxiraga olinishi nima bilan bog'liq? 

- Asadulla yozgi yig'inimizda qatnasha olmadi. Jarohatdan qaytdi. Sekin-asta jamoamizga qo'shilib bordi. O'yin amaliyoti beryapmiz. Bugun rotaciya qilmasak bo'lmasdi. Qaysidir manoda tavakkal qildim. Asadulla to'liq sport formasida emas. Oldinda o'yinlarimiz bor. Asadulla o'zini ko'rsatadi deb o'ylayman. Rejam bo'yicha uni bir taym ko'rib olmoqchi edim. Yomon o'ynamadi, biroz jismoniy tomondan oqsadi. 

- Goldan so'ng orqaga o'tirib qoldik... 

- Bu tabiiy holat. Balki yosh, balki tajribasizlik etishmadi. G'alaba qozondik deb o'ylashadi. O'yindan-o'yinga kuchayib borishimiz kerak. Bu yigitlar kelajakda Superligada, terma jamoada o'ynashadi. 

- Birinchi davrada gol urishga qiynalgan bo'lsa, ikkinchi davrada gol o'tkazmaslikda muammoga uchramoqda... 

- Bu tajriba bilan bog'liq. Har bir poziciyada muammolarimiz bor. Begis Kuanishbaev o'zini ko'rsatdi. Buni takidlash zarur.