ФИФА собиқ президенти Йозеф Блаттер АҚШ иммиграция идораларининг 2026 йилги Жаҳон чемпионатига сомалилик ҳакам Омар Абдулкадир Артанни киритмаслик тўғрисидаги қарори учун ташкилотни танқид қилди.
"Бу ақлбовар қилмас ва телбалик. Кимдир Жаҳон чемпионатини ташкил этиш масъулиятини бирор мамлакатга юкласа, иккита муқаддас ва фундаментал тамойил мавжуд. Биринчиси, мамлакат тадбирда таъминлаши керак бўлган хавфсизлик. Иккинчиси, барча ФИФА расмий шахсларига кириш визаларини бериш. Ҳакамдан кўра расмийроқ шахс йўқ. Агар мамлакат ҳакамнинг киришини рад этса, бу жиддий муаммо ва Жаҳон чемпионати бундай мамлакатда ўтказилмаслиги керак. Айб биринчи навбатда ФИФАда: у мамлакат [АҚШ] риоя қилмаётган ушбу тамойилдан воз кечди. Биз турнирни тўхтата олмаймиз, аммо бу нонормал ҳолат.
Амалдаги президент [ФИФА] ўзининг Оқ уйдаги катта дўстидан кучлироқ эканлигини кўрсатиши керак, шундай эмасми? Кимдир сиёсатда устунлик қила бошласа, бу ёмон. Бошқа федерациялар ҳам бунга қарши норозилик билдириши керак эди", — дея Блаттернинг сўзларини келтиради "L'Équipe".
Артан ўз мамлакатидан турнирнинг финал босқичи ҳакамлари рўйхатига киритилган биринчи ҳакам ҳисобланади. 2025 йилда у Африка футбол конфедерацияси талқинига кўра қитъанинг энг яхши ҳаками деб топилганди.
