Aybek Nurbaev: "Ilk turda "Aral"ga qarshi bahsdagi mag'lubiyatdan keyin futbolchilarni ruhiy o'radan olib chiqib ketishim kerak edi"

"Bugun stadionga kelib bizni qo'llab turgan barcha muxlislarga rahmat aytaman. O'z uyimizda g'alaba qozonmasak bo'lmasdi. Yaqindagina kubok bahsini o'tkazdik va qisqa muddatda ikkita o'yinda maydonga tushdik. Tiklanish oson bo'lmadi. "Olimpik"ning "Lokomotiv" bilan o'yinini ko'rib chiqdik va raqibni yaxshi o'rgandik. Har bir futbolchining harakatlarini o'rgandik. Oldinda bizni "Lokomotiv" va FarDUga qarshi ikkita safar o'yini kutib turibdi. Bugun maydonga tushgan va zaxirada qolgan barcha futbolchiga rahmat aytaman. 

Ilk turda "Aral"ga qarshi bahsdagi mag'lubiyatdan keyin futbolchilarni ruhiy o'radan olib chiqib ketishim kerak edi. O'sha bahsni tezroq unutish uchun ko'rib ham chiqmadik. 

"Olimpik" o'tgan yil Superligada o'ynagandi. Tarkibi o'zgarib ketgan. Jamoa "Lokomotiv"ga qarshi juda yaxshi o'ynadi va 2:0 hisobida oldinda ham bordi. Har bir futbolchisining kelajagi bor deb o'ylayman. 

Standartlar ustida ko'proq ishlashimiz kerakligi bilamiz. Yigitlarimizga biroz tajriba ham etishmayapti. Mashg'ulotlarda ko'proq ishlaymiz. 

Asadulla Qutiboev "Nasaf"da edi va mart oyida bizning jamoamizga kelib qo'shildi. Shu bois hali to'la kirishib ketgani yo'q. 

Ruslan Anuarov va Shuhrat Daryabaev sariq kartochkasi borligi uchun almashtirdik. Qizil kartochka olib qo'ymasligi uchun shunday qildik", - dedi Aybek Nurbaev.