Avazbek O'lmasaliev: "Oldimda "Bunyodkor"dan tashqari takliflar ham bor edi, lekin..."

Mazkur muloqot savol-javob ko'rinishida muxlislar etiboriga havola etilmoqda.

- Avazbek, taklifimizni qabul qilib biz bilan muloqotga kirishganingiz uchun minnatdorchilik bildiramiz. Aytingchi, nega hozirgi kunda "Lokomotiv"dan ketdingiz?

- Etibor uchun, sizlarga ham rahmat. Hozir ham "Lokomotiv" futbolchisiman, "Bunyodkor"da ijara asosida o'ynayapman. Buning sababi kiyim almashtirish xonasida jamoadoshim bilan tortishib qolganim uchun yuzaga keldi. O'ylab ko'rib o'zim ham buni istadim va "Bunyodkor" variantini tanladim.

- "Neftchi"dan ketishingizga nima sabab bo'lgan?

- O'shanda mening oldimda Superliga klublaridan taklif bor edi. Oila azolarim bilan kelishgan xolda "Lokomotiv" variantini tanladik. Maqsadim kelajakda kuchli Evropa chempionatlarida ham o'zimni sinab ko'rish, bunga erishish uchun astoydil harakat qilayapman.

- Futbolga kirib kelishingiz jarayoni qanday bo'lgan?

- Bolaligimda onam meni futbol internatiga olib borardilar. Keyinchalik mashg'ulotlarni akam bilan olib borganmiz. Bilasizlarmi, o'shanda akam mashg'ulotlarni juda ham qattiqqo'llik bilan o'tkazardilar, to'g'risi oson kechmagan. 15 yoshimda "Neftchi" klubi bilan shartnoma imzolaganman. SHundan so'ng yoshlar jamoasida o'ynashni boshlaganman. Vadim Abramov "Neftchi" bosh murabbiyi etib tayinlangach, 17 yoshimda meni asosiy tarkib jamoasiga jalb etgan.

- Aytib o'tganingizdek, hozir "Bunyodkor"dasiz. Nima uchun bu klubni tanladingiz, odingizda boshqa variantlar ham bor edimi?

- Ha, menda variantlar bor edi. "Bunyodkor"dan tashqari "Paxtakor", AGMK, "Andijon”, “Qo'qon-1912" jamoalari meni o'z saflarida ko'rishni istashgandi. Vadim Abramov bilan maslahatlashgan xolda "Bunyodkor" variantini tanladim.

- Faoliyatingizda eng yodda qolgan o'yiningiz va urgan golingiz qaysi?

- Hali yoshman, nasib bo'lsa oldinda o'yinlarim ko'p. Lekin hozirda men uchun eng esda qolgan qadrli o'yin "Neftchi" safida "Mashal" bilan o'tkazilgan uchrashuv deb o'ylayman. Eng qadrli gol ham aynan o'sha o'yinda urgan golim hisoblanadi.

- Siz bilan ishlagan murabbiylar ichida eng maqul kelganlari qaysi?

- Vadim Abramov va Bahrom Haydarov.

- "Neftchi" klubiga tilaklaringiz qanday?

- Bu yilgi mavsum yakunida "Neftchi" Superligaga qaytishiga tilakdoshman. Jamoaga faqat omad va g'alabalar yor bo'lishini tilayman.

Onlayn muloqot jarayonidan matnlarni Bekzod Tolibov yozib oldi.