Asqar Umarov: “Navbahor” o'z darajasini ko'rsatdi, bizga esa biroz tajriba etishmadi”

"Albatta, juda chiroyli o'yin bo'ldi. “Navbahor” jamoasi o'z darajasini ko'rsatdi, bizga esa biroz tajriba etishmadi. Asosiysi, bunday uchrashuvlar biz uchun dars bo'ladi. Kamchiliklar ustida ishlaymiz", - dedi Asqar Umarov.

- Bugun shogirdlaringiz tajribali raqibga munosib qarshilik ko'rsatishdi. Ularni qanday ruhlantirdingiz?

- “Zomin” jamoasi muxlislar uchun o'ynaydi, ular bugun ham futbolchilarimizni qo'llab-quvvatlab turishdi. Kiyinish xonasida yigitlarga astoydil harakat qilishlari kerakligi, “Navbahor” tarkibida ham o'zlariga o'xshagan o'yinchilar to'p tepishini tushuntirdik. Superligada ishlayotgan murabbiylar qarshisida o'zlarini ko'rsatishlari kerakligini takidladik. Ular aytganimizni bajarishdi, shogirdlarimga harakatlari uchun rahmat aytaman.

- Jamoangizga “Olimpik”ga qarshi kechgan avvalgi uchrashuvda nima etishmadi?

- O'sha bahsda tezkor gol o'tkazib yuborganimiz bizga pand berdi. Ikkinchi bo'limda vaziyatni o'nglashga urindik, ammo vaqt etmadi.

- Keyingi turda o'tadigan “Navbahor” – “Olimpik” o'yini haqidagi fikringiz qanday?

- “Navbahor”da katta tajriba bor, aynan tajriba o'z so'zini aytsa kerak, deb o'ylayman. O'z navbatida, “Olimpik” jamoasiga ham omad tilaymiz. Tarkibida juda yaxshi, tezkor yoshlar jamlangan, hammasi tartibli o'ynaydi. Maydon tekis, to'p dumaloq, omad qaysi jamoa tomonida bo'lsa, g'alaba o'shanga nasib qiladi.