"Arsenal" yana ikki futbolchisi bilan shartnomani uzaytiradi

"To'pchilar" kecha braziliyalik hujumchi Gabriel Martinelli bilan uzoq muddatli bitim tuzganini malum qilgan edi. Endi Angliya Premer-ligasi vakili Bukayo Saka va Vilyam Salibalar bilan amaldagi kelishuv muddatini bir necha yilga cho'zib qo'ymoqchi.

Franciyalik markaziy himoyachi Saliba "Arsenal"ga 2019 yilning 25 iyulida kelib qo'shilgan. Uning klub bilan kuchda bo'lgan shartnomasi 2024 yil yozida nihoyasiga etadi. Himoya chizig'i vakili joriy mavsumda "Arsenal" libosida jami 23 ta o'yinda maydonga tushdi.

21 yoshli angliyalik vinger Bukayo Saka "Arsenal" tarbiyalanuvchisi bo'lib, 2019 yil yozida klub bilan professional bitimga imzo chekkan. Uning amaldagi shartnomasi 2024 yil yozida yakun toradi. 100 mln evroga baholanayotgan futbolchi ushbu mavsumda APL vakili safida 27 ta o'yinda 8 ta gol va 7 ta asist natijasini qayd etdi.