Anvar G'ofurov: “Uchrashuvning muhimligi “el-klassiko”dek bo'ldi”

Uchrashuvdan so'ng “Obod” jamoasi himoyachisi Anvar G'ofurov o'yin haqida fikr bildirdi.

“Birinchi bo'lim so'nggida biz 10 kishi bo'lib qoldik. Jamoadoshimiz Doniyor Hasanov hakam tomonidan ikkinchi sariq kartochkani ishlab olib maydondan chetlatildi. SHuning uchun o'yin surati ham o'zgardi oldimizdagi vazifa ham o'zgardi. To'liq tarkib bilan o'ynayotganimizda vazfiamiz raqib darvozasiga gol urish bo'lgan bo'lsa, kamchilik bo'lib qolganimizdan so'ng “ko'rpaga qarab oyoq uzatdik”. SHuning uchun ham hich bo'lmasa durang natijani saqlab qolmoqchi edik. Agarda kamchilik bo'lib qolganimizdan so'nggi vaziyatni nazarda tutadigan bo'lsak, natija o'yinga mos bo'lmadi, deb o'ylayman.

Jamoadoshlarim bilan minimal natija qayd etganimizdan xursandmiz. Bir taym kamchilik bo'lib harakat qilish juda ham qiyin. To'g'risini aytsam, bugungi uchrashuvning muhumligi “el-klassiko”dek bo'ldi. Biz ligada qolish uchun o'ynagan bo'lsak, ular yani “Real” va “Barselona” chempionlik uchun kurash olib borishadi. Muhimligi mana shunda. Maydonga Alisher SHog'ulomov tushganidan so'ng, u bilan biroz tortishib qoldik. Bu tabiiy hol, futbolda bunday hodisalar bo'lib turadi.

Maydonda kamchilik bo'lib qoldikmi, demak har birimiz ikki baravar kuch bilan o'ynab chetlatilgan futbolchini o'rnini bildirmasligimiz kerak. Agarda to'liq tarkib bilan harakat qilganimizda men jamoadoshimga etiroz bildirmasdim. Baribir eng asosiysi natija, men jamoadoshlarimning ko'rsatgan o'yinidan qoniqish hosil qildim. SHog'ulomovdan norozi emasman. Barcha gap so'zlar maydonda qolib ketadi. Tashqariga chiqqandan so'ng, aka-uka, oshna-og'aynigarchilik davom etadi”, - deydi “Obod” jamoasi himoyachisi Anvar G'ofurov.

Jahongir Sotvoldiev