Anvar Berdiev: "Hujumchi bitta himoyachini aldab o'ta olmasa, u hujumchi hisoblanmaydi. Isoqov, Hamidullaevlar yana chiqadi. Faqat..."

"O'yin haqida nima deyish mumkin, O'zbekistonning eng kuchli jamoasiga qarshi o'ynadik. "Nasaf" jamoasini g'alaba bilan tabriklayman

- "Sho'rtan" jamoasi oldiga qanday vazifa qo'yilgan?

- Maqsadimiz har bir o'yinda g'alaba qozonish. Bu yil bizga juda qiyin bo'lishini bilamiz. Shunga qaramasdan harakat qilamiz. Futbolchilarimizning ko'pi Pro ligada o'ynagan. O'ylaymanki, ular o'yindan-o'yinga o'zlarini ko'rsatib borishadi.

- Qishda tarkibga bir necha nafar futbolchilar taklif qilindi. Mazkur transferlardan ko'nlingiz to'lyaptimi?

- Biz imkon darajasida vaziyatimizdan kelib chiqib futbolchi tanladik. Istaymizmi yoki yo'q Superligada futbolchilarning mahorati o'yin natijasini hal qilib ketmoqda. Tarkibimizga jalb qilingan futbolchilarga ishonaman. "Nasaf" jamoasida boshqacha vazifa. Ko'p yosh futbolchilar ishonchni oqlashga harakat qilishsa bundan ham kuchliroq o'ynay olishadi. 

- Qaysi chiziqlar qoniqtirmayapti?

- To'g'risini aytsam bizning oqsayotgan chizig'imiz hujum nuqtasi bo'lib turibdi, qishda ham yaxshi hujumchi topishga harakat qildik. 

- "Sho'rtan"ning Superligadagi imkoniyatlarini necha foizga baholaysiz?

- Oldindan biror narsani bashorat qila olmayman. O'zimizning maydonga qaytsak g'uzorlik muxlislar oldida kuchliroq o'ynashga harakat qilamiz. Uyda futbolchilar ham boshqacha ishtiyoq bilan to'p tepadi. 

- Jamoa 4 ta o'yinda 1 ochko ishladi. Ko'p ochko yo'qotyapti. Keyingi o'yin "Navbahor"ga qarshi bo'ladi. Bu o'yinda himoyaviy o'yin taktikasida va natija uchun o'ynaladimi? Balki rotaciyalar qilishga harakat qilasizmi?

- Bu o'yingacha kamchiliklarimiz ustida ishlaymiz. Himoyaviy taktika har doim ish berishi qiyin. O'zim hujumkor o'yin tarafdoriman. Agar oldindagi futbolchilar vaziyatlarni golga aylantira olmasa juda qiyin. Eng yaxshi himoya hujum degani. 

- Siz o'ynagan davrda yaqqol hujumchi ajralib turardi. Anvar Berdiev gol urishini oldindan hamma bilardi. Hozir nima uchun  hujumchilar chiqmayapti? 

- To'g'risini aytsam individual kuchli futbolchilar kamayib ketdi, chunki ko'plar jamoviy o'yinga etibor qaratmoqda. O'zbekistonda iqtidorli futbolchilar ko'p. Agar ular bilan ishlashsa yana vaqti kelib Isoqov, Hamidullaevga o'xshagan futbolchilar etishib chiqadi. Agarda hujumchi bitta himoyachini aldab o'ta olmasa u hujumchi hisoblanmaydi. Bu mening shaxsiy fikrim. Necha yildan beri Superligada legioner futbolchilar to'purar bo'lib kelyapti. 

- Muhriddin Zoirov jamoa bilan Superligaga chiqdi. Uning o'rnini qanday to'ldirmoqchisiz?

- Zoirovni jamoada olib qolmoqchi edik. Lekin bizning taklif qilgan shartlarimiz maqul kelmadi shekilli boshqa jamoaga yo'l oldi. Hozir tarkibdagi bor futbolchilardan foydalanib turamiz.