Amirjon Safarov: "Gollarim "Dinamo"ga g'alaba keltirganidan xursandman"

Uchrashuvdan keyin yosh hujumchining fikrlari bilan qiziqdik.

Samarqanddagi dastlabki tur o'yinida g'alaba qozonishimiz shart edi. Zaxiradan tushib ikki golim evaziga jamoam g'alabasini taminlaganimdan juda xursandman - deya gap boshladi Dinamo hujumchisi.

- Zaxiradan maydonga tushayotganingizda murabbiylar qanday ko'rsatma berishgandi?

- Jarohat olgan Azamat Bobojonov o'rniga maydonga tushganligim bois, murabbiylarimiz to'pni o'zimda ushlab, tezkor hujumga ko'proq o'tishimni takidlashgandi. SHu bois imkon bo'ldi deguncha hujumga o'tdim. Qolaversa, hujumda Alisher aka Xoliqovdek tajribali hujumchi bilan birga to'p surganim katta yordam bo'ldi. U kishidan ham juda ko'p narsa o'rganayapmiz.

Jamoamiz murabbiylari barcha yoshlarga imkoniyat berishmoqda. Ularni ishonchini oqlab, bundan foydalanishga intilayapmiz. Butun mavsum o'yinlar hali oldinda. Umid qilamanki, qolgan o'yinlarda ham o'z gollarim va g'alabamiz bilan Dinamo muxlislarini xursand qilamiz.