Alijon Isoqov: “Kamoliddinga har doim yordam berishga tayyorman”

Kattalar o'rtasidagi futbol boshlangan mahal paytdan foydalanib Alijon Isoqovdan ham intervyu oldik.

-   O'zbek futbolining oddiy bir muxlisi sifatida do'stim Kamoliddin Kenjaevga atab xayriya akciyasi tashkil qilinganidan juda xursandman. SHunday tadbir bo'lishi haqida eshitgan zahoti hamma ishimni bir chetga qo'yib, mana shu tadbirda qatnashaman deb rejalashtirib qo'ygandim. Hozir kayfiyatim juda alo, Kamoliddinning o'zi ham juda xursand. Negaki o'z vaqtida futbol o'ynab xalqqa tanilgan, biroq avtofalokat tufayli futboldan chetga chiqib qolgan Kamoliddin Kenjaev uchun shunday xayriya akciyasining tashkil etilishi katta voqea bo'ldi. Men buning uchun barcha tashkilotchilarga, xususan championat.asia saytiga, viloyat hokimligiga hamda “Nasaf” futbol klubiga o'z minnatdorchiligimni bildiraman. Bu ish ham savob, ham ko'pchilik uchun o'rnak bo'ldi. Oramizda Kenjaevning muxlislari hozir ham ko'pchilikni tashkil etadi, shular qatorida men ham borman.

-   Kamoliddin Kenjaevni anchadan beri bilasiz, to'g'rimi?
-   To'g'risini aytsam, men Kamoliddin bilan bitta qishloqda o'sib ulg'ayganman. O'sha noxush voqeadan beri har oyda bir yoki ikki marta uyiga borib xabar olib turaman. O'zimdan ham bir necha bor shunday tadbir o'tkazaylik degan takliflar bo'lgandi. Mana hozir shu xayriyada ishtirok etib turganimdan xursandman. Bundan keyin ham shunday tadbirlarda qatnashishga doim tayyorman. Kamoliddinga uzoq umr, sihat-salomatlik, kelin bilan qo'sha qarishini tilab qolaman.