Алижон Исоқов: “Камолиддинга ҳар доим ёрдам беришга тайёрман”

Катталар ўртасидаги футбол бошланган маҳал пайтдан фойдаланиб Алижон Исоқовдан ҳам интервью олдик.

-   Ўзбек футболининг оддий бир мухлиси сифатида дўстим Камолиддин Кенжаевга атаб хайрия акцияси ташкил қилинганидан жуда хурсандман. Шундай тадбир бўлиши ҳақида эшитган заҳоти ҳамма ишимни бир четга қўйиб, мана шу тадбирда қатнашаман деб режалаштириб қўйгандим. Ҳозир кайфиятим жуда аъло, Камолиддиннинг ўзи ҳам жуда хурсанд. Негаки ўз вақтида футбол ўйнаб халққа танилган, бироқ автофалокат туфайли футболдан четга чиқиб қолган Камолиддин Кенжаев учун шундай хайрия акциясининг ташкил этилиши катта воқеа бўлди. Мен бунинг учун барча ташкилотчиларга, хусусан championat.asia сайтига, вилоят ҳокимлигига ҳамда “Насаф” футбол клубига ўз миннатдорчилигимни билдираман. Бу иш ҳам савоб, ҳам кўпчилик учун ўрнак бўлди. Орамизда Кенжаевнинг мухлислари ҳозир ҳам кўпчиликни ташкил этади, шулар қаторида мен ҳам борман.

-   Камолиддин Кенжаевни анчадан бери биласиз, тўғрими?
-   Тўғрисини айтсам, мен Камолиддин билан битта қишлоқда ўсиб улғайганман. Ўша нохуш воқеадан бери ҳар ойда бир ёки икки марта уйига бориб хабар олиб тураман. Ўзимдан ҳам бир неча бор шундай тадбир ўтказайлик деган таклифлар бўлганди. Мана ҳозир шу хайрияда иштирок этиб турганимдан хурсандман. Бундан кейин ҳам шундай тадбирларда қатнашишга доим тайёрман. Камолиддинга узоқ умр, сиҳат-саломатлик, келин билан қўша қаришини тилаб қоламан.