Aleksandr Xomyakov: "Yigitlar xarakter ko'rsata olishdi"

"Qiziqarli o'yin guvohiga aylandik. Barchasi juda ajoyib o'tdi. Stadiondagi muhit, muxlislar, yorqin futbol, umuman menda bularning barchasi yaxshi taasurot qoldirdi. Yigitlarga o'yin uchun raxmat aytaman, ular xarakter ko'rsata olishdi.

"Nasaf" kuchli jamoa, xalqaro maydon tajribasiga ega. Bugungi o'yinda har ikki jamoa ham mahoratli futbol ko'rsatib berishdi. Aytish joiz, bugun biz ham yaxshi o'ynadik, raqib jamoa ham.

Birinchi bo'limning dastlabki 15 daqiqasida mehmonlar yaxshi o'yin namoyish etishdi. Keyinroq biz ham o'z o'yinimizni topib oldik. "Nasaf"ning qarshi hujumi gol bilan yakunlandi, shundan so'ng yigitlar xarakter ko'rsatib, hisobni tenglashtirishdi. O'yinning oxirigacha intiriga saqlanib qoldi. Bugun jamoamiz darvozaboni ham golli vaziyatlarni bartaraf eta oldi, zarbalarni qaytardi.

Zgurskiy hali yosh futbolchi. SHunday bo'lsa ham uning maydonda bajaradigan katta ko'lamli vazifasi bor. Bugun u "Nasaf" himoyachilariga yaxshi bosim uyushtirdi. Tarkibimizda yosh futbolchilar bor, ular o'yinlar davomida tajriba to'plab borishadi. Umumiy aytadigan bo'lsam ko'rsatgan o'yinimizdan qoniqish hosil qildim.

Kubokda kuchli jamoalarga qarshi o'ynaymiz? Bu yaxshi albatta. Kuchli raqib bilan o'ynasak, tajribamiz ortadi va o'yin sifati yanada kuchayadi" - dedi andijonliklar ustozi.