Aleksandr Xomyakov: "G'alabadan xursandmiz, lekin o'yindan qoniqmadim"

- To'g'risini aytsam, o'yindan unchalik qoniqmadim, ammo g'alabadan hammamiz xursandmiz. Negadir shogirdlarim men xohlagan futbolni namoyish etishmadi. Ehtimol bu ikkinchi bosqich o'yinlarining endi boshlangani bilan bog'liqdir.

- “Mashal”ning qanday o'yin namoyish etishi raqibning kimligiga bog'liqmi?
- Negadir futbolchilarimiz “Paxtakor” bilan o'yinlarda o'zlarini yo'qotib qo'yishadi. Oldin “Bunyodkor” bilan ham shunday bo'lardi, lekin sekin-asta bu qo'rquvni engib boryapmiz. Ammo “Paxtakor”dan hadiksirash “Mashal” o'yinchilarida hamon davom etmoqda.

- Sizningcha, oldinda muxlislarni qanday chempionat kutib turibdi?
- Hozirdan bir narsa deyish qiyin, ammo birinchi liga turdan turga qiziydi degan umiddaman.

- Jiddiy kurashlar bo'ladimi?
- Menimcha, bo'ladi. SHuni ishonch bilan aytishim mumkin, “Mashal”ni bir qator qiyin bellashuvlar kutib turibdi va yigitlardan bo'shashmaslikni so'rab qolaman.

- Ikkinchi bosqichda “Mashal”ning asosiy raqobatchisi sifatida kimni ko'ryapsiz?
- Faqat o'zimizni. CHunki hech bir jamoaning bizdan ustun joyi yo'q. Boshqalar uchun bizni mag'lubiyatga uchratish oson bo'lmaycdi. Biz faqat o'zimizning xatomiz tufayligina yutqazib qo'yishimiz mumkin. Birinchi ligada hech qaysi jamoa o'z kuchi bilan bizni yuta olmaydi.

- “Oqtepa” bilan o'yinda Sanjar Quvvatov va Jahongir Abdumo'minov maydonga tushadimi?
- Bilasiz, bu ikki futbolchimiz hozir milliy terma jamoa tarkibida. Eshitishimcha, 14 avgust kuni terma jamoa o'rtoqlik uchrashuvi o'tkazadi. Ertasi kuni esa bizning o'yinimiz bor. SHunday ekan, hozircha bu borada bir narsa deya olmayman.