Aleksandr Mochinov: Futbolchilarimiz matonat ko'rsatishdi

Bugungi ajoyib o'yin uchun raqibimizga minnatdorchilik bildiraman. KXDR nafaqat guruhning, balki butun turnirning favoritlari qatorida bejizga tilga olinmadi. Bugungi ajoyib g'alaba uchun o'z shogirdlarimga ham minnatdorchilik bildiraman. Kuchli raqibga qarshi munosib va ajoyib o'yin ko'rsatdik va g'alaba qozondik, - deydi Mochinov o'yindan keyingi matbuot anjumanida.

SHu o'rinda, bizni o'yingacha qo'llab-quvvatlab turgan va dalda berib turgan barcha insonlarga ham rahmat aytmoqchiman. Kecha, xabaringiz bo'lsa Toshkentda milliy terma jamoamiz Yangi Zelandiyani o'rtoqlik uchrashuvida mag'lub etdi. Ushbu o'yindan so'ng, milliy terma jamoa futbolchilari ham telefon orqali bog'lanib bizga o'yinda omad tilashdi. Bundan hursand bo'ldik. Bizni o'yin davomida stadionning o'zidan qo'llab quvvatlash uchun O'zbekistondan tashrif buyurgan muxlislarimizga esa alohida rahmat. Ularni xursand qilishimiz shart edi, - deydi O'zbekiston o'smirlari bosh murabbiyi.

Aleksandr Mochinov shuningdek, o'yindan oldin shimoliy koreyalik futbolchilarning o'yinini tomosha qilgani va ular juda hujumkor o'yin ko'rsatishini takidlab o'tdi.

KXDR terma jamoasining hujum chizig'i juda kuchli. Raqibning ilk 15 daqiqadagi bosimiga dosh berishimiz kerak edi. Ammo, baribir juda erta o'z darvozamizdan to'p o'tkazib yubordik. SHunday bo'lsada, tezda o'zimizni o'nglab oldik va xatto birinchi bo'limni o'z foydamizga hal qilib chiqib ketdik. Futbolchilarimiz o'z matonatlari va mahoratlari evaziga bugun g'alaba qozonishdi. Biz bu uchrashuvni ham tezroq unutib Kuvaytga qarshi bundanda yaxshiroq tayyorgarlik ko'rishimiz kerak, - deydi Mochinov.