Aleksandr Ejov: Xorazm oldiga hech qanday vazifa qo'yilmagan

- Aleksandr, kutilmagan mag'lubiyat borasidagi taassurotlaringizni bildirsangiz...
- Bugun muxlislar kurashlarga boy shiddatli o'yin guvohi bo'lishdi. “SHerdor” jamoasini haqli g'alaba bilan tabriklayman. Afsuski, bugun futbolchilarimiz “SHerdor” jamoasi kuchini munosib baholashmadi. Raqib jamoa nisbatan yoshligi bois, bemalol yutamiz degan fikr bilan maydonga tushishdi. Natijada jazolandik. Ayniqsa, 1-bo'limda deyarli 100 foizlik uchta imkoniyatni qo'ldan boy berganimiz ham jamoamizga tasirini o'tkazdi. “SHerdor” jamoasi esa katta ishtiyoq bilan to'p surib g'alabaga erishdi.

- “SHerdor” ketma-ket ikki uchrashuvda “Labsa” va “Nurashon”ga qarshi ham ochiq va hujumkor o'yin namoyish etgandi. Murabbiylar shtabi bu jamoaning o'yinini o'rganishganmidi?
- Yo'q to'liq o'rganmagan edik. Ammo “SHerdor” oldingi bosqichda 120 daqiqa to'p surib “Labsa”ni mag'lub etganligi bois, jismoniy holati yaxshi ekanligini bilardik. SHu bois, jamoamiz futbolchilariga birinchi bo'limning o'zidayoq vaziyatlardan foydalanib, o'yin taqdirini hal qilish lozimligini uqtirgandim. Afsuski, gollarni urolmadik. Raqib esa 2-bo'limda vaziyatlaridan gollar urdi.

- “Xorazm” 1-bo'limda “SHerdor”dan ustun ekanligini ko'rsatgandek edi, ammo 2-bo'limda o'yini umuman qovushmadi. Bu jismoniy holat bilan bog'liqmi?
- CHindanam fikringizga qo'shilaman. Ikkinchi bo'limdagi o'yinimiz mavsum oldi yig'inlardagi tayyorgarligimiz bilan bog'liq. Biz xatolarimiz ustida hali ko'p ishlashimiz kerak.

- “Xorazm” oldiga mavsum oldidan qanday vazifa qo'yilgan?
- Oldimizda hech qanday vazifa qo'yilmagan. Vazifamiz Pro-Liga “A” guruhidan tushib ketmay, o'rnimizda qolish.

- Har holda “Xorazm” viloyatning bosh klubi, jamoada qanday muammolar bor?
- Keling, shu savolingizga javob bermay. Muammolar bor, ammo buni muhokama qilishni istamayman. Bir marotaba bu haqda gapirib ko'rganman... SHunday ekan, bu savolingizni izohsiz qoldiraman. Vazifa haqida so'radingiz, javobim shu – oldimizda hech qanday vazifa yo'q.

Usmon IBODOV yozib oldi.