Akmal Xolmurodov: “Qo'qon-1912” jamoasiga o'tishimning sababi bor”

Xolmurodov yangi mavsumni “Qo'qon-1912” jamoasi tarkibida boshlaydi.

“Ayni damda “Qo'qon-1912” jamoasi tarkibida bugundan ikkinchi qishki yig'in mashg'ulotlarini boshladik. Jamoada menga o'xshagan bir qator yashgi futbolchilar bor. Yaqin kunlarda Serbiyadan ikki legioner futbolchi tashrif buyuradi. Hozircha futbolchilar bilan yaxshi chiqishib ketdim. Hamma shart-sharoitlar meni qoniqtirmoqda. “So'g'diyona” jamoasidan ushbu klubga o'tishimning sababi bor. Joriy yil o'yinim umuman qovushmadi.

Barcha biladi bir qator o'yinlarda ketma-ket qizil kartochkalar ishlab oldim. Antirekord qayd etdim desam ham bo'ladi. “So'g'diyona” jamoasidagi o'yinimdan umuman qoniqish hosil qilmadim. “Qo'qon-1912” jamoasiga o'tishimning sababi ham shu. Farg'onaning “Neftchi” Namanganning “Navbahor” klublaridan takliflar bor edi. Lekin meni barcha shart-sharoitlar va jamoaning o'z oldiga qo'ygan vazifasi qoniqtirgani uchun ushbu jamoani tanladim.

“So'g'diyona” klubi meni shunchaki qo'yib yuborishni istamadi. Men o'zim jamoani tark etishni xohladim. “Qo'qon-1912” jamoasi bosh murabbiyi No'mon aka Hasanov bilan bir paytlar birga ishlaganimiz uchun ham shunday qaror qabul qildim. Eng to'g'ri qarorni qabul qildim, deb o'ylayman”, - deydi Akmal Xolmurodov.

Jahongir Sotvoldiev