Akmal Rustamov: "Qizil kartochka va penalti o'yinni hal qildi"

"Bugungi uchrashuvga yaxshi tayyorgarlik ko'rgandik. Birinchi penalti va qizil kartochka o'yinga tasir o'tkazdi, nazarimda. Yigitlarga harakat uchun rahmat aytaman. O'yinni tahlil qilib "Dinamo"ga qarshi o'yinga tayyorgarlik ko'rishni boshlaymiz", - dedi Akmal Rustamov bahs yakunlangach.

- "Mashal"ga qarshi o'yinni hisobga olmasak "Qizilqum" ko'p mag'lubiyatga uchradi va ochkolar yo'qotdi. Buning sababi nimada? "Qizilqum" quyi pog'onalardan uzoqlashganidan so'ng biroz erkinlikka berildimi?

- Fikringizga qo'shilmayman. Bizda to'liq ikkita tarkib yo'q. Shuningdek, bir nechta futbolchilarimiz jarohatda. Vahobov bugun maydonga qaytdi. Biz imkon qadar yuqoridan joy olishga maksimal harakat qilamiz. Keyingi mavsumda esa yanada ko'proq yoshlarni jalb etamiz.

- Islom Kenjaboevning ikkinchi taymda o'yinga qo'shilgani ham jarohat sabablimi? "Buxoro"ga qarshi nazorat uchrashuvida ham Kenjaboev maydonda yo'q edi...

- Ha. Kenjaboev o'tgan mavsum "Nasaf" safida jarohat olgan va jarrohlik amaliyotini o'tkazgan edi. Hozir u yana og'riq his qilmoqda. Keyingi o'yinlarda uning sog'lig'i yaxshi bo'lsa, yana maydonga qaytadi. U bizga kerakli o'yinchi. Bunday yaxshi o'yinchini zaxirada ushlab o'tirishdan mano yo'q.

- Sanjar Quvvatov penaltilarni bartaraf etish bo'yicha juda yaxshi darvozabon. "Paxtakor"da o'ynagan vaqti bir nechta muhim o'yinlarda 11 metrlik zarbalarni bartaraf etgan edi. Bugun esa Quvvatov ikkita zarbani ham qaytara olmadi...

- Belgilangan penaltilarni qayta ko'rib chiqish kerak. Menimcha, ikkinchi penalti yo'q edi. Hali takroriy vaziyatni ko'rib chiqmadim. Penalti - lotereya. 

- Chempionat yakunida ko'pgina o'rtamiyona jamoalar maqsadsiz bo'lib qolgani tufayli o'yindagi pasayish kuzatiladi. Yani motivaciya yo'qolib qoladigandek. "Qizilqum"da ushbu holat kuzatilmaydimi?

- Jamoamizda ruhiyat yaxshi. Bugungi o'yinni qizil kartochka va penalti hal qildi. Nasib bo'lsa, chempionat yakunida yuqori o'rinlar uchun kurashamiz. Jarohatdagi futbolchilarimiz tezroq safga qaytsa, musobaqa jadvalida imkon qadar ko'tarilishga harakat qilamiz.