Akbar To'raev: "Asosiy vazifamiz OCHL guruh bosqichiga chiqish"

Biz “Bunyodkor” darvozaboni Akbar To'raevdan mavsumga tayyorgarlik haqida intervyu oldik.  

- Mavsumga qay darajada tayyorgarlik ko'ryapsizlar?
- Bugun 2016 yilgi ilk nazorat o'yinimiz bo'ldi, futbolchilar yaxshi harakat qilishdi deb o'ylayman. O'rtoqlik o'yinlarida natija birinchi o'rinda turmaydi, biz uchun jismoniy tayyorgarlik muhim. Hozir hamma futbolchilar mashg'ulotlarda katta yuklamalar olyapti, shu bilan o'yin o'tkazyapmiz. Eng asosiysi jismoniy holatimizni tiklab olish.

- OCHLda pley–offga qay darajada tayyorgarlik ko'ryapsizlar?
- OCHLga 14 dekabrdan tayyorgarlikni boshlaganmiz, 28 dekabrgacha jismoniy tayyorgarlik mashqlarini olib bordik. Sekin–sekin to'plar bilan mashg'ulotlar o'tkazyapmiz. Hozircha hammasi reja asosida ketyapti.

- Rahbariyat OCHLda qanday vazifalarni qo'ygan?
- Hozirgi birinchi maqsadimiz pley–off bosqichidan chiqish. Guruh bosqichiga o'tkanimizdan so'ng guruhdan chiqish ikkinchi vazifamiz.

- Rejada xorij yig'ini ham joy olgan. U erda ko'proq nimalarga etibor qaratasizlar?
- Xorijda yanvarning ikkinchi yarmidan boshlab yig'in o'tkazamiz. Xorijda o'rtoqlik o'yini o'tkazish uchun Rossiya, Koreya va Xitoy jamoalari bilan muzokaralar olib borilyapti. Ushbu o'rtoqlik o'yinlari OCHL pley–off bosqichi uchun optimal tarkibni aniqlab olishga tayyorgarlik vazifasini o'tab beradi.

Jahongir Sotvoldiev suhbatlashdi