Акбар Тўраев: "Мақсад - "Нефтчи"ни Суперлигага қайтариш"

"Нефтчи" билан янги мавсумга қизғин тайёргарлик олиб бормоқдамиз. Йиғинни Тошкентда бошладик, сўнг "Ҳоким кубоги" мусобақасида давом эттирдик. Мазкур турнир ҳар томонлама фойдали бўлди, дея оламан. Футболчилар ўша вақт ҳали тўлиқ тайёр эмасди. Шунингдек, таркибдаги аксарият футболчилар янги эди. Камчиликлар кўрингани рост. Машғулотларда бунинг устида ишлаяпмиз. Айни пайтда тайёргарликнинг учинчи қисмини ўтказмоқдамиз. Ўртоқлик учрашувлари орқали бир-биримизни яхшироқ тушуниб боряпмиз. 

Кўраётган бўлсангиз ПРО-Лига ҳам бугунги кунга келиб Суперлигадан қолишаётгани йўқ. Ўтган йилдан бошлаб учрашувлар жонли эфирда трансляция қилинмоқда. Барча жамоалар олдига жиддий мақсад қўйган. "Нефтчи"нинг лойиҳаси узоқ йиллик. Биринчи босқич жамоани Суперлигага қайтариш. Бу йилдаги асосий вазифамиз ҳам шундай",- дейди Акбар Тўраев.