AGMK yangi kelgan futbolchilarga jamoa liboslarini taqdim etdi

AGMK futbol klubi rahbariyati bugun jamoaga yangi kelib qo'shilgan futbolchilarga o'z raqamlari tushirilgan liboslarni taqdim etdi.

Jamoamiz safini to'ldirgan tayanch yarim himoyachisi Erkin Baydullaev, gruziyalik hujumkor vinger Elguja Grigalashvili, belaruslik himoyachi Vladislav Kasminin hamda chernogoriyalik mudofaa chizig'i vakili Igor Zonichning AGMKga o'tganiga bag'ishlangan rasmiy taqdimot marosimi bo'lib o'tdi.

AGMK klubi bosh menejeri Muxtor Qurbonov jamoa qarorgohida yozgi transfer oynasida jamoaga kelib qo'shilgan va transfer qilingan futbolchilarga liboslarni taqdim etib, ularning faoliyatiga omad tiladi.

Erkin Baydullaev AGMK tarkibida 3-raqamda o'ynashni maqul ko'rdi. Elguja Grigalashvili esa bo'sh turgan 7-raqamni tanladi. Markaziy himoyachilar Vladislav Kasminin 77-raqamni olgan bo'lsa, Igor Zonich 88-raqamda o'ynashga qaror qildi.

SHu tariqa AGMK tarkibiga kelib qo'shilgan yangi futbolchilar jamoaga rasman tanishtirildi. Umid qilamizki, mazkur futbolchilar AGMK safida yorqin o'yin ko'rsatib, jamoamiz g'alabalarida o'z hissalarini qo'shishadi.

Klub bosh menejeri Muxtor Qurbonov jamoaning yozgi transfer kampaniyasi haqida quyidagilarni takidlab o'tdi:

— CHempionat avvalida medallarni qo'lga kiritishni maqsad qilgandik. Biroq birinchi davrada bazi o'yinlarda omad bizdan yuz o'girdi, futboldagi fart biz tomonda bo'lmadi. O'yin taraflama jamoamiz yaxshi ko'rindi. Buni tahliliy statistik malumotlar orqali ham bilsa bo'ladi. Faqatgina natija borasida biroz oqsadik. O'yindagi kichik epizodlar ko'plab bahslarda bellashuv taqdirini hal etib ketdi. Yozgi transfer kampaniyasi yaxshi bo'ldi. Baydullaevning tajribasi, Grigalashvilining iqtidori, Kasminin va Zonichning himoyadagi mustahkam o'yini bizga birinchi davrada etishmagan jihatni to'ldiradi deb o'ylayman. Jamoa mashg'ulotlarini kuzatdim, yangi futbolchilar kollektivga kirishib ketishgan. Bu jihat odamni quvontiradi. Birinchi davrada yo'qotilgan ochkolar o'rnini ikkinchi davrada qoplab, oldimizga qo'yilgan yuqori maqsadlar sari intilamiz, — dedi Muxtor Qurbonov.