Abdurahmon Fozilov: "BAAda muxlislar jamoasi Qatardagidan kam bo'lmaydi"

- SHu paytgacha uchta Osiyo Kubogida qatnashib qaytdingiz. SHubhasiz, ular orasida Qatar alohida ahamiyat kasb etadi. Muxlis sifatida navbatdagi musobaqadan nima kutayapsiz?
- Avvalgi musobaqalarda murabbiylarimizning barchasi mahalliy edi. Bunisiga esa argentinalik mutaxassis bilan boramiz. Haqiqatdan ham Qatardagi musobaqa zo'r o'tgan. Tashkilotchilikdan tashqari O'zbekiston milliy terma jamoasi ham muxlislarga yoqadigan o'yin ko'rsatgan edi. Umid qilamanki, BAAda ham shunday bo'ladi. Eng muhimi, bu safar har qachongidan ko'ra ko'proq muxlis bilan musobaqaga ketayotganimiz.

- Nechta muxlis to'plashga erishildi?
- Hozirgacha 180 nafardan oshdi. Lekin qolgan sayyohlik firmalari va o'zi bormoqchi bo'lganlarni qo'shganda menimcha, 400 nafardan oshamiz. Qolaversa BAAda istiqomat qilayotgan hamyurtlarimiz ham bizga qo'shilishlari aniq. Bu musobaqada O'zbekiston eng ko'p muxlislariga ega terma jamoalardan biri bo'lsa ajab emas.

- Yaqinda Avstraliyada tashkil qilingan ikkita o'rtoqlik uchrashuvida bo'lib qaytdingiz. Afsuski, terma jamoamizning o'yini ko'ngilni xira qildi.
- Ha, Avstraliyadagi yurtdoshlarimiz bilan o'yinlarni tomosha qildik. Afsuski, ikkita o'yin ham bizni xursand qilmadi. Lekin BAAda buning aksi bo'ladi deb o'ylayman. Yana shuni unutmaslik lozim, bular o'rtoqlik uchrashuvi edi.

- Osiyo Kubogiga qaysi viloyatdan borish ishtiyoqi katta bo'lyapti?
- Andijon! Osiyo Kubogida muxlislik qiladigan vodiyliklar 60 nafardan oshishgan. Xudo xohlasa, terma jamoamizning har bir g'alabasidan keyin andijoncha osh bor (kuladi). Qolgan shahar va viloyatlardan ham muxlislar juda ko'p va biz u erda bir jamoa bo'lamiz. Rejaga ko'ra, har bir o'yinda terma jamoani 2000 nafarga yaqin muxlis bilan qo'llab-quvvatlashimiz kerak.

- Muxlislar futboldan tashqari vaqtni qanday o'tkazadilar, ularga yaratilgan sharoitlar bo'yicha ham aytib o'tsangiz.
- Avvalo BAAda kishi zerikib qolmaydi. O'zbekiston milliy terma jamoasining o'yinlaridan tashqari muxlislar Yaponiya, Janubiy Koreya va Avstraliya kabi terma jamoalar bahsiga tashrif buyurib, kuchli beshlikda faoliyat olib borayotgan futbolchilarning o'yinlarini jonli ko'rishlari mumkin bo'ladi. Undan tashqari, plyaj, osmono'par binolarga sayr. Abu Dabidagi "Ferrari" bog'i, safari kabi sayyohlar ko'p boradigan joylar. Plyaj futboli bo'yicha muxlislar ishtirokida shou tashkil qilamiz. Bu borada Osiyo Kubogiga kelgan boshqa davlat muxlislari bilan bahslashamiz. Undan tashqari biz bilan safar qiladigan muxlislar uchun O'zbekiston ramzlari tushirilgan ko'plab sovg'alarimiz bor.

- Eng ko'p muxlis aynan siz tomoningizdan tashkil qilinayotgan guruhda yig'ildi...
- Sababi oddiy, hamkorlarimiz bilan 2007 yildan beri faoliyat olib borayotgan bo'lsak, 11 yil ichida bu yo'nalishda katta tajriba to'pladik. Natijada odamlarda ishonch paydo bo'ldi va eng muhimi mablag'ga emas, terma jamoamizni qo'llab-quvvatlashga etibor qaratganimiz. Biz bilan safarga chiqqan muxlis albatta keyingisiga ham kelyapti.

- SHu kungacha O'FF vakili sifatida muxlislar bilan safar qilayotgan edingiz, bir yil bo'ldi, tashkilotda ishlamayapsiz...
- O'FFda ishlagan paytimda ham, undan keyin ham o'zim yo'lga qo'ygan tadbirkorlik ishlarim bor. Sir saqlamayman, Surxondaryoda fermer xo'jaligim mavjud. SHu bilan birga sayyohlik firmam ham bor. Undan tashqari zanglamas temir mahsulotlari bilan ulgurji savdo va ishlab chiqarish bilan shug'ullanyapman. Muxlislar klubi rahbarligi men uchun lavozim emasdi. Bu ishni yaxshi ko'raman va muxlis sifatida faoliyat olib borishim uchun aniq bir joy kerak emas deb o'ylayman. "Fanatlik" bu kasb emas - kasallik. SHunga bizni davolab bo'lmaydi (kuladi). SHuning uchun tomirlarimda qon oqar ekan, Vatanimiz bayrog'ini jahon sport arenalarida hilpiratishda davom etaman. Yagona aytadigan gapim: Olg'a, O'zbekiston!

Xayrulla Xoliqov yozib oldi.

Batafsil: https://t.me/AsianCup2019Fans

Murojaat uchun: +998901759001