2017 yil birinchi ligada qaysi jamoalar ishtirok etadi?

O'zbekiston Birinchiligining yangi mavsumida ham 18ta jamoa ishtirok etadi. O'tgan, 2016 yilgi mavsumda "Oq-tepa" muddatidan avval musobaqani tark etgan bo'lsa, "Paxtakor-2" chempionatni 17-o'rinda yakunlagani bois, bu yilgi bahslarda qatnashishdan mahrum bo'lgan.

Reglament bo'yicha ushbu jamoalar chempionatda qatnashmasligi aniq. Mavsumni 15-, 16-o'rinlarda yakunlagan "G'ijduvon" va "Kosonsoy" "pulka"da ishtirok etishlari lozim edi, biroq g'ijduvonliklardan farqli ravishda Namangan jamoasi o'tish bahslarida qatnashmadi. Buxoro klubi esa, "o'tish bahslari"dan "o'ta" olmadi. Natijada har ikkala ishtirokchi ham 1-ligani tark etdi. "Pulka"da omadli ishtirok etgan "Neftchi" (Surxondaryo), "G'allakor-Barsa" (Jizzax), "Yangier" (Sirdaryo) va "Istiqlol" (Farg'ona) jamoalari O'zbekiston Birinchiligining 2017 yilgi mavsumi qatnashchilariga aylandi. Mazkur to'rt klub bilan chempionat ishtirokchilari soni 18taga etadi.

Tajribadan kelib chiqib aytadigan bo'lsak, bu hali yakun emas. Sababi, O'zbekiston Birinchiligi ishtirokchilari so'nggi pallada va xatto chempionat arafasida ham yangilanishi mumkin. Buni klublarning moliyaviy holati hal qiladi. Agar moliyaviy muammolar tufayli biror bir jamoa chempionatda qatnasha olmasa, ularning o'rnini to'ldirishga tayyor ishtirokchilar ham bo'ladi. Qolganini 1 fevral kuni bilib olamiz.