Аввалроқ "Реал" ҳужумчиси The Bridge подкастида диктатор ҳақидаги мемларга бўлган муносабати ҳақидаги саволга жавоб бераётиб, Хитой инқилобчиси Мао Цзэдунни диктатор деб атаган эди, бу эса Хитой мамлакатида кескин танқидга сабаб бўлди. Эҳтиётсизлик билан айтган баёнотлари сабабли мадридликлар форварди Хитойдаги бирданига учта реклама шартномасидан маҳрум бўлди.
"Биз Килиан Мбаппенинг Хитойда норозилик ва хафагарчилик келтириб чиқарган баёнотларидан чуқур афсусдамиз. Биз етказилган зарарни тушунамиз ва Ла Лига номидан Хитой халқига самимий узримизни билдирмоқчиман.
Кўп йиллар давомида биз Хитой билан — унинг ҳукумати, спорт ташкилотлари, медиа ҳамкорлари ва испан футболининг миллионлаб мухлислари билан ҳурмат, ишонч ва ҳамкорлик асосида муносабатларни ўрнатиб келдик. Бир инсоннинг ҳаракатлари ушбу муносабатларга соя солишига ёки профессионал лигаларимизнинг 20 дан ортиқ клубига ҳамда миллий аҳолиси бўлган миллионлаб хитойлик мухлисларимизга салбий таъсир кўрсатишига йўл қўя олмаймиз.
Биз ўзимизга боғлиқ бўлган барча чораларни кўряпмиз ва юзага келган вазиятни тартибга солиш учун Хитойдаги ҳамкорларимиз ва манфаатдор томонлар билан яқин алоқада ишламоқдамиз. Хитойга, унинг халқи ва институтларига бўлган содиқлигимиз ўзгармасдан қолади. Шунча йиллар давомида қурилган муносабатлар алоҳида бир ҳодиса сабабли азият чекмаслиги керак", — деб ёзди Тебас Х ижтимоий тармоғида.
Кейинроқ Ла Лига раҳбари юзага келган вазиятни муҳокама қилиш ва ҳодисани бартараф этиш йўлларини топиш учун Хитойнинг Испаниядаги элчиси билан учрашув ўтказганини маълум қилди.
