Superliga
10-tur
“Paxtakor” - “Nasaf” 2:2
Toshkent. “Paxtakor” stadioni. 20:00
Bosh hakam: Akobirxo'ja Shukurullaev
Yordamchi hakamlar: Alisher Usmonov, Baxtiyorxo'ja Shavkatov
Zaxira hakami: Feruzbek Hidoyatov
VAR: Asker Najafaliev
AVAR: Ruslan Serazitdinov
Nazoratchi: Baxtiyor Tagaev
Komissar: Mamur Sultonov
⚽️Gollar: 1:0 – 42, Hojiakbar Alijonov (Sherzod Nasrullaev), 1:1 – 56, Sardorbek Bahromov (Sharof Muhitdinov), 2:1 – 90+2, Flamarion (penalti), 2:2 – 90+3, Bobir Abdixoliqov (Sardorbek Bahromov)
"Paxtakor": 35.Sanjar Quvvatov, 4.Zaid Tahsin (5.Muhammadqodir Hamraliev, 78), 7.Hojiakbar Alijonov, 10.Akmal Mozgovoy, 17.Dostonbek Hamdamov (77.Oybek Bozorov, 67), 21.Bashar Resan (11.Hojimat Erkinov, 60), 23.Abdurauf Bo'riev (9.Ibrohim Ibragimov, 60), 27.Sardor Sobirxo'jaev, 34.Sherzod Nasrullaev (8.Dilshod Saitov, 67), 50.Flamarion, 55.Muhammadrasul Abdumajidov.
Zaxira: 12.Vladimir Nazarov, 3.Shahzod Azmiddinov, 14.Rustam Turdimurodov, 19.Pyotr Pajishek.
"Nasaf": 1.Abduvohid Ne'matov, 5.G'olib G'aybullaev, 6.Sardorbek Bahromov, 8.Zafarmurod Abdiraxmatov, 10.Bobir Abdixoliqov, 14.Sharof Muhitdinov (23.Dilshod Murtazaev, 80), 15.Oybek Rustamov, 17.Murodbek Rahmatov (22.Diyor Abdunazarov, 46), 27.Yashnarbek Berdirahmonov (20.Yusuf Otubanjo, 46), 32.Quvonchbek Xushvaqtov, 92.Umar Eshmurodov.
Zaxira: 21.Samandar Muratbaev, 4.Akramjon Komilov, 33.Bahodir Xalilov, 76.Zafar Sadullaev, 80.Davronbek Usmonov, 99.Kingsli Sokari.
🟨Ogohlantirishlar: G'olib G'aybullaev (32), Quvonchbek Xushvaqtov (45+2), Bobir Abdixoliqov (90+4)
Chetlatish: Quvonchbek Xushvaqtov (90, ikkinchi ogohlantirish)
Uchrashuv yakunlandi! Hakamning so'nggi xushtagi yangradi.
Bugun biz haqiqiy futbol spektakliga, drama va kutilmagan burilishlarga boy bo'lgan o'yinga guvoh bo'ldik. "Paxtakor" va "Nasaf" o'rtasidagi murosasiz bahs jangovar durang – 2:2 hisobida o'z nihoyasiga etdi.
Uchrashuvning so'nggi daqiqalari uzoq vaqt muxlislar yodida saqlanib qolishi aniq:
90+2–daqiqada Flamarion penaltidan unumli foydalanib, mezbonlarni oldinga olib chiqdi.
90+3–daqiqada esa bir kishi kam bo'lib qolgan "Nasaf" aqlbovar qilmas iroda ko'rsatib, muvozanatni tiklashga erishdi.
Qarshiliklar safida o'yin oxirini ozchilik bo'lib o'tkazganiga qaramay taslim bo'lmagan futbolchilarning mehnatini, shuningdek, "Sherlar"ning hujumkor va bosimli o'yinini alohida etirof etish joiz. Ikkala jamoa ham bugun maydonda muxlislar uchun borini berib harakat qildi.
Matnli translyatsiyamizni shu yerda yakunlaymiz. E'tiboringiz va hamrohligingiz uchun tashakkur!
90+6–daqiqa. Xavfli vaziyat! "Paxtakor" g'alabani ilib ketish uchun bor kuchi bilan oldinga tashlanmoqda.
Zaxiradan o'yinga qo'shilgan Oybek Bozorov jarima maydoni yaqinida to'pni qabul qilib oldi va darvozani nishonga oldi. Uning kuchli va xavfli zarbasidan so'ng "Nasaf" posboni Abduvohid Ne'matov haqiqiy mahorat ko'rsatdi. Ne'matov ajoyib seyv ijro etib, to'pni qaytarishga erishdi va jamoasini muqarrar goldan qutqarib qoldi.
Drama davom etmoqda, qo'shib berilgan vaqtning so'nggi soniyalari qoldi. Hisob hamon – 2:2.
90+3–daqiqa. ISHONIB BO'LMAYDI! DAHSHAT! GOOOOOOL!
"Nasaf" bir kishi kam bo'lib qolganiga va gol o'tkazib yuborganiga qaramay, oradan bir daqiqa o'tar-o'tmas javob qaytarmoqda! Mana buni iroda desa bo'ladi!
Zaxiradan o'yinga qo'shilgan Dilshod Murtazaev himoyadan to'pni oldinga uzun qilib etkazib berdi. Birinchi gol muallifi Sardorbek Bahromov ikkinchi qavatdagi kurashda havodagi ustunligini ko'rsatib, to'pni jamoadoshiga yo'naltirdi. "Nasaf"ning 10–raqamli futbolchisi Bobir Abdixoliqov esa darvozabon bilan yakkama-yakka vaziyatga chiqib bordi va Sanjar Quvvatovni ojiz qoldirib, to'pni darvoza to'riga joyladi.
Hisob – 2:2! O'yin tugashiga oz vaqt qolganda haqiqiy "futbol trilleri" guvohiga aylanyapmiz. Stadionda aqlbovar qilmas muhit! Ikkinchi bo'limga qo'shib berilgan daqiqalar hali davom etadi!
90+2–daqiqa. GOL!
"Paxtakor" uchrashuvning so'nggi daqiqalarida yana oldinga chiqib olmoqda! Flamarion 11 metrli nuqtaga yaqinlashib, juda sovuqqonlik bilan zarba yo'lladi. "Nasaf" posboni Abduvohid Ne'matov to'pning yo'nalishini topa olmadi va darvoza to'ri titradi.
Hisob – 2:1! "Sherlar" nafaqat hisobda, balki maydonda ham son jihatdan ustunlikka ega bo'lgan holda g'alabani naqd qilishga yaqin turishibdi. Stadion hayqiriqlardan larzaga kelmoqda!
90–daqiqa. Ikkinchi bo'limning asosiy vaqti o'z nihoyasiga etdi. Zaxira hakami tomonidan ko'rsatilgan tabloga ko'ra, uchrashuvning ikkinchi bo'limiga naq 7 daqiqa vaqt qo'shib berildi.
VAR tekshiruvi, penalti belgilanishi va qizil kartochka bilan bog'liq to'xtalishlar sababli qo'shib berilgan bu daqiqalar o'yinning haqiqiy kulminaciyasiga aylanadigan ko'rinadi. Hozir esa maydonda penalti ijro etilishi kutilmoqda. Stadionda hayajon juda yuqori, "Paxtakor" g'alabani ilib ketish uchun yaxshi imkoniyatga ega!
90–daqiqa. Drama va kutilmagan burilish! Hakam Akobirxo'ja Shukurullaev monitor qarshisidan qaytdi va 11 metrli nuqtani ko'rsatdi – PENALTI!
Hakamning fikricha, burchak to'pi uzatilayotgan vaqtda Quvonchbek Xushvaqtov Muhammadrasul Abdumajidovning yuz qismiga zarba bergan. Bu vaziyat nafaqat penalti, balki Xushvaqtov uchun ikkinchi sariq kartochkaga ham sabab bo'ldi. Natijada "Nasaf" himoyachisi qizil kartochka olib, maydonni tark etdi.
Qarshiliklar o'yinning eng hal qiluvchi pallasida ham bir kishi kam bo'lib qolishdi, ham o'z darvozalariga penalti qabul qilib olishdi. Stadionda haqiqiy "futbol trilleri". Hozir penalti ijro etiladi. Bu o'yin taqdirini hal qiluvchi zarba bo'lishi mumkin!
86–daqiqa. O'yinning eng hayajonli pallasi! Hakam Akobirxo'ja Shukurullaev VAR monitori tomon yo'l oldi.
Burchakdan uzatilgan to'p paytida "Paxtakor" himoyachisi Muhammadrasul Abdumajidov raqib jarima maydoni ichida Quvonchbek Xushvaqtov bilan to'qnashuv natijasida maydonga yiqilgan edi. Videotakrorlarda vaziyat ancha bahsli ko'rinmoqda. Agar penalti belgilansa, bu o'yin taqdirini hal qilishi mumkin.
Butun stadion nafasini ichiga yutib, hakamning yakuniy qarorini kutmoqda. "Nasaf" futbolchilari etiroz bildirishmoqda, "Paxtakor" esa 11 metrli nuqtani kutyapti. Daqiqalar o'tmoqda, bosim esa eng yuqori nuqtada!
80–daqiqa. "Nasaf" tarkibida navbatdagi o'zgarish. Qarshiliklar bosh murabbiyi o'yinning so'nggi qismi uchun yangi kuchlarni maydonga tushirmoqda:
Bugungi golda assistentlik qilgan va maydonda katta hajmdagi ishni bajargan Sharof Muhitdinov zaxiraga olindi. Uning o'rniga Dilshod Murtazaev o'yinga qo'shildi.
Mehmonlar yarim himoya va hujum o'rtasidagi bog'lamni yangilab, so'nggi daqiqalarda g'alaba to'pini kiritishga harakat qilib ko'rishadi. Hisob hamon – 1:1.
78–daqiqa. "Paxtakor" tarkibida navbatdagi o'zgarish. Mezbonlar bosh murabbiyi himoya chizig'ini yangilashga qaror qildi:
Zaid Tahsin o'z o'rnini Muhammadqodir Hamralievga bo'shatib berdi.
O'yinning hal qiluvchi pallasi yaqinlashmoqda. Ikkala jamoa ham ehtiyotkorlikni saqlagan holda g'alaba to'pini kiritishga harakat qilishyapti. Hisob hamon – 1:1.
73–daqiqa. “Paxtakor”dan navbatdagi bosim! Hojimat Erkinov jarima maydoni ichiga, markazga chiroyli uzatma etkazdi. Flamarion “akrobatik zarba” ijro etishga shay turgan bir vaqtda, Umar Eshmurodov bosh bilan to'pni qaytarib yubordi va xavfni bartaraf etdi. Agar himoyachi ulgurmaganida, stadionda navbatdagi supergolni ko'rishimiz mumkin edi. Hisob – 1:1.
71–daqiqa. Xavfli vaziyat! "Paxtakor" hisobda oldinga chiqib olish uchun yana bir imkoniyatni qo'ldan boy berdi.
Hojiakbar Alijonovdan navbatdagi ajoyib uzatma! Uning zargarona pasidan so'ng Ibrohim Ibragimov raqib darvozaboni bilan yuzma-yuz vaziyatga chiqib bordi. Biroq Ibrohimning bergan zarbasiga aniqlik yetishmadi – to'p darvoza to'sini yuqorisidan o'tib ketdi.
"Sherlar" bosimni kuchaytirishda davom etmoqda, biroq yakuniy zarbada aniqlik yetishmayapti. Hisob hamon – 1:1.
70–daqiqa. “Paxtakor”dan navbatdagi xavfli hujum! Akmal Mozgovoy maydon markazidan oldinga uzun uzatma amalga oshirdi. “Nasaf” darvozaboni Abduvohid Ne'matov jarima maydonidan ancha oldinga chiqib, to'pni tepib yuborishda kichik xatoga yo'l qo'ydi.
Qaytgan to'p Flamarionga borib tushdi, biroq braziliyalik hujumchi bo'sh qolgan darvozaga zarba berishiga raqib futbolchisi yo'l qo'ymadi. Ne'matovning xatosi mehmonlarga qimmatga tushishi mumkin edi. Hisob hamon – 1:1.
67–daqiqa. “Paxtakor” tarkibida navbatdagi o'zgarishlar. Mezbonlar bosh murabbiyi qanotlarni yangilashga qaror qildi:
Dostonbek Hamdamov o'rniga maydonga Oybek Bozorov tushdi.
Sherzod Nasrullaev o'z o'rnini Dilshod Saitovga bo'shatib berdi.
"Sherlar" tarkibida tezkor va yangi kuchlar paydo bo'ldi. Bu o'zgarishlar o'yin suratiga va qanotlardagi faollikka qanday ta’sir qilishini kuzatamiz. Hisob hamon – 1:1.
65–daqiqa. Xavfli vaziyat! "Nasaf" vakili Diyor Abdunazarov jarima maydonining o'ng tomonida Sherzod Nasrullaevni chiroyli harakat bilan aldab o'tdi va chap oyoqda darvozaga kuchli zarba yo'lladi.
"Paxtakor" posboni Sanjar Quvvatov mahorat ko'rsatib, to'pni qaytarishga erishdi. Qarshiliklar bosimni tobora oshirmoqda, mezbonlar himoyasi esa jiddiy sinovdan o'tmoqda. Hisob – 1:1.
64–daqiqa. "Nasaf" yana oldinga intilmoqda. Gol muallifi Sardorbek Bahromov raqib darvozasini olis masofadan nishonga oldi. Biroq uning kuchli zarbasiga biroz aniqlik yetishmadi – to'p darvoza to'sini yuqorisidan o'tib ketdi. Mehmonlar tashabbusni o'z qo'llarida ushlab turishibdi.
62–daqiqa. "Nasaf" vakili Zafarmurod Abdiraxmatovdan xavfli hujum. U jarima maydoni yaqinidan darvozaning yaqin burchagini ko'zlab kuchli zarba yo'lladi. Biroq uning urinishi biroz noaniq chiqdi – to'p darvoza ustuni yonidan o'tib ketdi. Qarshiliklar ikkinchi gol uchun jiddiy intilishmoqda.
60–daqiqa. "Paxtakor" tarkibida ikkita o'zgarish. Mezbonlar bosh murabbiyi o'yin tizginini qaytadan o'z qo'liga olish va hujumkorlikni oshirish uchun maydonga yangi kuchlarni tashladi:
Abdurauf Bo'riev maydonni tark etdi, uning o'rniga Ibrohim Ibragimov tushdi.
Bashar Resan o'rniga esa Hojimat Erkinov o'yinga qo'shildi.
"Sherlar" yarim himoya va qanotlarni yangiladi. Hisob – 1:1. Kurash davom etadi.
60–daqiqa. "Nasaf" vakili Sharof Muhitdinov o'ng burchakka yaqin nuqtadan jarima zarbasini ijro etdi. Uning to'g'ri darvozaga yo'llagan zarbasi biroz noaniq chiqdi – to'p darvoza yuqorisidan o'tib ketdi.
59–daqiqa. Maydonda qoida buzildi. “Paxtakor” a'zosi Sherzod Nasrullaev zaxiradan o'yinga qo'shilgan Diyor Abdunazarovni yiqitdi. Hakam o'yinni to'xtatib, “Nasaf” foydasiga jarima zarbasi belgiladi. Mehmonlarda standart vaziyat.
49–daqiqa. Xavfli vaziyat! Sardor Sobirxo'jaevning pasidan so'ng Flamarion jarima maydoni ichida to'pni qabul qilib oldi va darvozaga zarba berdi. To'p ustunning yonidan o'tib ketdi.
48–daqiqa. “Paxtakor” ikkinchi bo'limni ham faol boshladi. Bashar Resan jarima maydonining chap tomonidan ichkariga yorib kirdi va xavfli uzatmani amalga oshirdi. Biroq to'p yo'lida hech kim topilmadi va u maydonni tark etdi. To'p o'yinga autdan kiritiladi.
46–daqiqa. Ikkinchi bo'lim boshlandi! Uchrashuv davom etadi.
"Nasaf" tarkibida ikkita o'zgarish amalga oshirildi: Yashnarbek Berdirahmonov o'rniga Yusuf Otubanjo, Murodbek Rahmatov o'rniga esa Diyor Abdunazarov maydonga tushdi. Qarshiliklar bosh murabbiyi hujum chizig'ini kuchaytirish va muvozanatni tiklash maqsadida yangi kuchlarni o'yinga tashladi. To'pni mezbonlar o'yinga kiritib berishdi.
Birinchi bo'lim yakunlandi. Bosh hakam Akobirxo'ja Shukurullaev jamoalarni tanaffusga taklif etdi.
Dramatik va shiddatli kechgan dastlabki bo'limdan so'ng mezbonlar 1:0 hisobida oldinda borishmoqda. Bo'limning eng yorqin vaziyati sifatida Hojiakbar Alijonovning 42–daqiqada darvoza to'sinini titratib urgan "supergoli"ni ko'rsatish mumkin. Shuningdek, G'aybullaevning o'z darvozasi ustunini poylagani va bo'lim so'ngidagi VAR tekshiruvi bahsga qo'shimcha intriga bag'ishladi.
Hozircha tanaffus. Birozdan so'ng ikkinchi bo'lim bilan translyatsiyamizni davom ettiramiz.
45+4–daqiqa. Jarima zarbasini Dostonbek Hamdamov ijro etdi. Uning to'g'ri darvozaga yo'llagan zarbasi noaniq chiqdi – to'p darvoza to'sini yuqorisidan o'tib ketdi. Hisob o'zgarishsiz qoldi.
45+3–daqiqa. VAR hakamlari vaziyatni sinchiklab o'rganib chiqishdi. Bosh hakamning qarori o'z kuchida qoldi: Quvonchbek Xushvaqtovga ko'rsatilgan sariq kartochka o'zgarishsiz qoldirildi.
Ehtimol, to'p havoda bo'lgani va hujumchi uni hali to'liq nazoratga olib ulgurmagani sababli, hakamlar bu vaziyatni "so'nggi umid foli" deb baholashmadi. "Paxtakor" jarima zarbasini amalga oshiradi.
45+2–daqiqa. O'ta xavfli vaziyat va bahsli holat! Akmal Mozgovoy maydon markazining narigi tarafidan Flamarionga zargarona uzun pas etkazdi. Braziliyalik hujumchi darvozabon bilan deyarli yakkama-yakka chiqib borayotgan bir paytda, Quvonchbek Xushvaqtov uni ortdan qo'pollik bilan to'xtatib qoldi.
Bosh hakam Akobirxo'ja Shukurullaev "Nasaf" himoyachisini sariq kartochka bilan jazoladi. Biroq vaziyat "so'nggi umid foli" sifatida baholanishi mumkin. Hozirda VAR hakamlari vaziyatni sinchiklab ko'rib chiqishmoqda. Qizil kartochka bo'lishi ehtimoli bor. Stadionda sukunat, barcha hakamning yakuniy qarorini kutmoqda.
45–daqiqa. Birinchi bo'limning asosiy vaqti o'z nihoyasiga etdi. Zaxira hakami Feruzbek Hidoyatov tomonidan ko'rsatilgan tabloga ko'ra, bosh hakam birinchi bo'limga 3 daqiqa vaqt qo'shib berdi. Jamoalar tanaffusga qadar yana uch daqiqa davomida maydonda kurash olib borishadi.
36–daqiqa. Xavfli vaziyat! Flamarion jarima maydoni ichiga Bashar Resanni ko'zlab uzun uzatma amalga oshirdi. "Nasaf" himoyachisi G'olib G'aybullaev xavfni bartaraf etish maqsadida to'pga oyog'ini cho'zdi, biroq to'p kutilmaganda darvoza ustuniga tegib, maydonni tark etdi. Raqib hujumini buzishga uringan himoyachi o'z darvozasini ishg'ol qilishiga bir bahya qoldi!
35–daqiqa. “Paxtakor” himoyachisi Zaid Tahsin uzun uzatma bilan Dostonbek Hamdamovni oldinga boshladi. “Nasaf” posboni Abduvohid Ne'matov jarima maydonidan ancha oldinga chiqib, to'pni boshi bilan maydon tashqarisiga chiqarib yubordi. Vaziyat yakunlangach, qanot hakami Hamdamovning ofsaydda qolganini qayd etdi. To'p mehmonlarga qaytarildi.
32–daqiqa. Maydonda ehtiroslar qizimoqda. “Nasaf” himoyachisi G'olib G'aybullaev Akmal Mozgovoy bilan to'p uchun kurashda maydonga yiqildi. Vaziyat yuzasidan hakamga keskin etiroz bildirgani uchun G'aybullaevga sariq kartochka ko'rsatildi. Bosh hakam Akobirxo'ja Shukurullaev futbolchini tartibga chaqirib qo'ydi.
29–daqiqa. "Nasaf" hujumchisi Bobir Abdixoliqov havodagi to'p uchun kurashda sakrab, erga noqulay tarzda yiqildi. O'yin to'xtatildi. Hozirda tibbiy yordam xodimlari maydonda futbolchiga birinchi yordamni ko'rsatishmoqda.
26–daqiqa. “Paxtakor” o'ng qanotdan navbatdagi hujumini tashkil etdi. Hojiakbar Alijonovning jarima maydoni ichiga uzatgan to'pini “Nasaf” himoyachisi Umar Eshmurodov ishonchli tarzda qaytarib yubordi. Himoyachi o'z o'rnida bexato harakat qilmoqda.
23–daqiqa. “Paxtakor” jarima zarbasini amalga oshirdi. Hojiakbar Alijonovning jarima maydoniga havolatib uzatgan to'pini Zaid Tahsin bosh bilan darvozaga yo'lladi. Biroq zarba noaniq chiqdi – to'p darvoza ustuni yuqorisidan o'tib ketdi. Mezbonlar bosimni oshirishda davom etmoqda.
22–daqiqa. "Paxtakor" legioneri Flamarion maydon markazidan raqib himoyasini yorib kirishga intilgan bir vaziyatda, Oybek Rustamov uni to'xtatib qoldi. "Nasaf" yarim himoyachisi faollik ko'rsatib, mezbonlarning xavfli bo'lishi mumkin bo'lgan hujumini bartaraf etdi.
20–daqiqa. "Paxtakor"dan burchak zarbasi. Dostonbek Hamdamov to'pni jarima maydoniga uzatdi, Flamarion esa uni sherigiga etkazib berdi. Akmal Mozgovoy bosh bilan xavfli zarba yo'lladi, biroq to'p darvoza to'sini yuqorisidan o'tib ketdi. Mezbonlarda yaxshi imkoniyat yuzaga kelgandi.
19–daqiqa. “Paxtakor”ning navbatdagi hujumi. Sardor Sobirxo'jaev jarima maydoniga xavfli pas uzatdi. Biroq to'p yo'lida to'g'oniq bo'lgan G'olib G'aybullaevga tegib, maydon tashqarisiga chiqib ketdi. Mezbonlar burchak to'pini amalga oshirishadi.
15–daqiqa. "Nasaf" burchak to'pini amalga oshirdi. Sharof Muhitdinovning uzatmasidan so'ng to'p hech kimga tegmasdan maydonni tark etdi. Natijada hujum uzilib qoldi, to'p mezbonlarga o'tdi.
13–daqiqa. “Nasaf”dan xavfli hujum. G'olib G'aybullaev uzun uzatma bilan Bobir Abdixoliqovni oldinga boshladi. “Paxtakor” posboni Sanjar Quvvatov o'z vaqtida jarima maydonidan ancha oldinga chiqib keldi va to'pni boshi bilan qaytarib, yuzaga kelishi mumkin bo'lgan xavfni bartaraf etdi. Vaziyatni o'qishda darvozabondan mahorat!
10–daqiqa. Maydon markaziga yaqin hududda qo'pollik ishlatildi. “Nasaf” a'zosi Murodbek Rahmatov “Paxtakor” himoyachisi Hojiakbar Alijonovni yiqitdi. Bosh hakam o'yinni to'xtatib, mezbonlar foydasiga jarima zarbasi belgiladi.
8–daqiqa. “Paxtakor” qanot orqali hujum tashkil qildi. Hojiakbar Alijonov sherigini oldinga boshladi va uzatmani amalga oshirdi. Biroq pas biroz kuchli chiqdi va to'p to'g'ri “Nasaf” darvozaboni Abduvohid Ne'matovning qo'llariga kelib tushdi.
2–daqiqa. Xavfli vaziyat! Maydon markazida Akmal Mozgovoy faollik ko'rsatib, to'pni raqibdan olib qo'ydi va tezkor hujum boshladi. Flamarion jarima maydoni ichida Dostonbek Hamdamovni qulay poziciyaga chiqardi. Hamdamovning darvoza tomon yo'llagan kuchli zarbasi yo'liga Umar Eshmurodov oyog'i bilan to'g'anoq bo'lib, xavfni bartaraf etdi. "Nasaf" himoyachisidan mahorat!
1–daqiqa. Uchrashuv boshlandi! Bosh hakam Akobirxo'ja Shukurullaevning hushtagi yangradi va markaziy bahsga start berildi. To'pni maydon markazidan mehmonlar o'yinga kiritib berishdi. Jamoalarga omad tilaymiz!
Jamoalar maydonga chiqib kelishdi. Toshkentdagi "Paxtakor" stadionida Superliga 10-tur markaziy uchrashuvi boshlanish arafasida.
Mezbonlar – "Paxtakor" to'q binafsharang, mehmonlar – "Nasaf" esa qizil liboslarda to'p tepishadi. Bosh hakam Akobirxo'ja Shukurullaev boshchiligidagi hakamlar brigadasi jamoalarni maydon markaziga boshlab chiqdi.
