Жиззах клуби форварди билан кичик суҳбат уюштирдик.
— Суперлиганинг жорий мавсуми қандай таассурот қолдирмоқда?
— Чемпионатимизнинг бу йилги мавсуми ҳар доимгидан қизиқроқ ўтяпти. Буни ҳар турдан кейин мусобақа жадвалида етакчиларнинг ўзгараётганидан ҳам англаш мумкин. Менимча, бу йил чемпионлик кураши охирги турга қадар 5-6 жамоа ўртасида давом этади. Биз ҳам бор кучимиз билан чемпионлик учун ҳаракат қиляпмиз.
— Йил аввалида "Навбаҳор" ва хориж клубларидан таклифлар бўлгани ҳақида айтгандингиз. Айни пайтда "Пахтакор" ҳам яхши ҳужумчи топа олмагани кўриниб қолди. Қайсидир даврда улардан ҳам таклиф бўлганмиди сизга?
— Албатта. 2021 йилги мавсумнинг биринчи давраси тугаганидан кейин "Пахтакор"га чақиришганди. Лекин ўшанда "Сўғдиёна"га халқаро майдон йўлланмасини тақдим қилишимиз керак эди. Шу учун ҳам Жиззахда қолишга қарор қилгандим.
— Қишда чет элдан 3-4 та вариантларни кўриб чиққанингиз ҳақида биламиз. Сир бўлмаса, қайси давлатлардан чиқишди? Араб ўлкаларидан ҳам таклиф бормиди?
— Араб клубларидан ҳам қизиқиш бўлди. Улар билан шартнома борасида келиша олмадик. Шарқий Осиёдан тушган аниқ таклифларни эса рад қилдим.
— Бироқ, шарқда бизга нисбатан анча яхши тўлашади...
— Албатта. Таиланд, Малайзия, ҳатто Индонезиядан ҳам молиявий жиҳатдан яхшироқ шартномалар таклиф қилинди. Аммо Жиззахда қолишга қарор қилдим. Пул ишлашгаям улгурсак керак ҳали.
— Шоҳруз, кўпчилик Ўзбекистонда гол уриш бошқа чемпионатларга нисбатан қийинроқ эканини айтади. Бу фикрга қўшиласизми?
— Суперлига ҳеч қанақасига кучсиз чемпионат эмас. Осиёнинг унча-мунча лигаларидан олдиндамиз. Барча жамоалар натижа қилишга уринади. Шунинг учун асосан ҳимоявий футбол гувоҳига айланамиз. Бу ўз-ўзидан форвардларнинг ишини қийинлаштиради.
— Ўтган йили ОФК кубогида Норчаев тўпурар бўлганди. Турнирда бу йил сиз иштирок этасиз. Йил охирида "Олтин бутса"ни яна ўзбек футболчиси олишини кутаверайликми?
— Биринчи навбатда турнирни ютиш учун ҳаракат қиламиз. Насиб бўлса, албатта, шахсий совринларни ҳам ўзимизники қилишга уринамиз.
— Энди энг муҳим савол. Нечта гол урсам, терма жамоага таклиф қилишади деб ўйлайсиз?
— Менимча, бунинг голларга алоқаси бўлмаса керак. (кулади) Мураббийлар штаби айни пайтда энг кучли деб ҳисоблаган, тактикага тушадиган ўйинчиларини саралаб жалб қилади.
— Баъзилар Шоҳруз юқоридан кимнидир хафа қилиб қўйган деб ўйлайди. Ўзингизнинг муносабатингиз қандай бундай фикрларга?
— Йўқ, ҳеч ким билан жанжаллашмаганман. Ҳамма билан алоқаларим яхши. Бунақа фикрлар нотўғри.
— Охирги савол. Ўзбекистондан энг яхши дарвозабон ва тажрибали ҳимоячини айтинг. Кимга қарши ўйнаш сизга ноқулайроқ?
— Дарвозабонлардан Ўткир Юсупов, Абдувоҳид Неъматов ҳамда Санжар Қувватовни кўрсатган бўлардим. Чемпионатмизнинг энг кучли ҳимоячилари эса "Насаф"даги Алиқулов ҳамда АГМК етакчиси Анзур Исмоилов бўлса керак.
