"Навбаҳор" Голбан, Ҳамробеков, Сергеев ва Искандеров борасида расмий баёнот берди

Про-лигада эса 29 июндан жамоалар таътилга йўл олишади.  

Ўзбекистон Профессионал Футбол Лигаси ёзги трансферлар ойнаси 18 июнь – 15 июль саналари оралиғида бўлишини маълум қилди. Суперлига ҳамда Про-лига иштирокчи жамоалари мазкур давр оралиғида ўз таркибларини янги футболчилар билан тўлдириб олиш имкониятига эга бўлишади.  

Жумладан, жорий мавсумда ўз олдига юксак мақсадларни қўйган Наманганнинг “Навбаҳор” клуби ҳам трансферлар ойнаси вақтида ўз таркибига бир қатор янги ўйинчиларни қўшиб олишни режалаштирган. Бир неча кун олдин “лочинлар” таркибига ярим ҳимоячи Шерзод Каримов қўшилди ва бу ҳақда расмий сайтимизда хабар бердик.

Аммо айрим сайтларда жамоамизга оид тасдиқланмаган маълумотлар чоп этилмоқда. Жумладан, “Навбаҳор” таркибига “Насаф”нинг россиялик ҳимоячиси Игорь Голбан, шунингдек, қаршиликлар ярим ҳимоячиси, наманганлик футболчи Одил Ҳамробеков, БААнинг “Ал-Дафра” клубида фаолият юритаётган “Пахтакор”нинг собиқ ҳужумчиси Игорь Сергеев, “Пахтакор” ярим ҳимоячиси Жамшид Искандеров сингари футболчиларнинг келишлари ёзилмоқда. Аммо бу гаплар ҳозирча миш-мишдан бошқа нарса эмас.

Тўғри, “Навбаҳор” ПФК бир қатор футболчилар билан музокара олиб бормоқда. Лекин уларнинг исм-шарифлари ҳозирча сир. Музокаралар ижобий якун топса, расмий сайтимизда бу ҳақда биринчи бўлиб, хабар берамиз. Шунинг учун сизлардан турли ёлғон маълумотларга ишонмаслигингизни сўраймиз.

“Навбаҳор” ПФК матбуот хизмати.