Мустафо Байрамов: “Жамоанинг айрим мухлисларига “Навбаҳор”нинг салбий натижалари керакка ўхшайди”

«Қўқондаги мағлубиятдан кейин “Металлург”дан уч очкони олмасак бўлмасди. Айнан шундан келиб чиққан ҳолда ўйинга тайёргарлик кўрдик. Футболчиларимиз бугун яхши ўйин кўрсатишди. Гол уриш учун рақиб дарвозаси олдида қатор имкониятлар юзага келди. Лекин, барча вазиятларни голга айлантиришни имкони бўлмади. Боз устига етакчи ўйинчиларимизнинг бир гуруҳи турли сабабларга кўра майдонга туша олишмади. Шунга қарамай, муҳим ғалабани қўлга киритдик. Мухлисларимизни ушбу ғалаба билан табриклайман. Шу ўринда бир гапни айтиб ўтишни истардим. Жамоанинг айрим мухлисларига “Навбаҳор”нинг салбий натижалари керакка ўхшайди. Жамоа ютган пайтда бизни мақташади. Аксинча омадимиз чопмай имкониятни бой берган пайтларимизда далда бўлишни ўрнига оёғимизга болта уришга ҳаракат қилишади. Аслини олганда ашаддий ишқибоз ҳар қандай ҳолатда ҳам ўз жамоасига содиқ қолмоғи керак. Ана шундай мухлислардан “Навбаҳор”ни қийин кунларда ҳам қўллаб қувватлашларини тилаб қолардим. Ана ўшанда “Навбаҳор” аввалги мавқеини тиклаб олади деган умиддаман», - дейди Мустафо Байрамов.