Футболчининг сўзларига кўра, у "Пари Сен-Жермен" таклифини қабул қилишидан олдин Англия Премьер-лигасига кўчиб ўтишга бир қадам қолган экан. Мерсисайдликлар клубига ўтишнинг асосий ташаббускори эса унинг агенти вазифасини бажарувчи онаси Файза Ламари бўлган.
— Ҳа, ўша вақтларда ҳақиқатан ҳам "Ливерпуль"га ўтишга жуда яқин келгандим, — дея Мбаппенинг сўзларини келтиради The Athletic. — Онам Юрген Клоппнинг ашаддий мухлисаси ҳисобланади, шунинг учун у учун Англия варианти мутлақо устувор эди. У жуда ҳам "Энфилд"га йўл олишимни хоҳлаган эди. Бироқ мен бошқача қарор қабул қилдим, чунки ўша пайтда ўз туғилиб ўсган шаҳрим — Парижда ўйнашни қатъий мақсад қилгандим. Шахс сифатида ва катта футболчи бўлиб шаклланиб улгурмагунимча Францияни тарк этишни истамаганман. Аммо онам бу фикридан қайтмай, мунтазам равишда: "Ливерпуль"га ўт — у ердаги муҳит ва арена сен учун чинакам сеҳрли бўлади , — дер эди.
Ҳужумчи, шунингдек, ўша пайтда "қизиллар"ни бошқарган Юрген Клопп билан шахсан мулоқот қилганини ва германиялик мутахассис унда ўчмас таассурот қолдирганини таъкидлади:
— Ўша учрашувни ҳамон жуда яхши эслайман. Биз хусусий самолётда эдик ва Клопп ўз узоқ муддатли лойиҳасини қизиқиш билан таништириб бораётган бир пайтда самолёт ҳавода айланиб, тинимсиз парвоз қиларди. Бир лаҳзада унинг сўзини бўлиб дегандим: "Мени кўндиришингиз шарт эмас. Сиз — Юрген Клоппсиз, "Ливерпуль" эса улкан тарихга эга буюк клуб. Модомики, қаршингизда ўтирган эканман, демак, бунга катта қизиқишим бор. Бироқ айни пайтда столим устида ундан кам бўлмаган яна бошқа жозибали таклифлар ҳам турибди".
Эслатиб ўтамиз, Килиан Мбаппе катта футболга 2015–2018 йилларда тўп сурган "Монако" сафида кириб келган. Шундан сўнг у "Пари Сен-Жермен" шарафини ҳимоя қилиб, клуб тарихидаги энг яхши тўпурарга айланди ва 2024 йилнинг ёзида эркин агент мақомида расман Мадриднинг "Реал" клубига қўшилди.
