"Special One" ҳакамларни Мадрид клубига ён босишда айблади.
Нима содир бўлди?
Ўйиннинг 85-дақиқасида Винисиус Жуниор рақибига нисбатан қўполлик ишлатди, бироқ бош ҳакам Франсуа Летексье унга иккинчи сариқ карточкани кўрсатмади. Бундан ғазабланган Моуринью захира ҳакамига эътироз билдириб, кетма-кет иккита сариқ карточка олди ва майдондан қувилди.
Моуриньюнинг "аччиқ" ҳақиқати:
"Мени майдондан чиқариб юборишди, чунки мен яққол кўриниб турган гапни айтдим. Ҳакамнинг қўлида махсус варақча бор эди. У ерда Тчуамени, Хейсен ва Каррерас сариқ карточка олмаслиги кераклиги ёзиб қўйилганди. Чунки улар огоҳлантириш олса, жавоб ўйинини ўтказиб юборишарди.
Мен захира ўриндиғида 1400 та ўйин ўтказганман ва кимга карточка бериш мумкин-у, кимга мумкин эмаслигини яхши биламан. Бу тизим қандай ишлаши бизга маълум. «Реал» ғалабага лойиқ эди, лекин бу бошқа масала", — деди Моуринью "Movistar"га берган интервьюсида.
Жавоб ўйини ҳақида:
Мураббий Мадриддаги баҳсни ўтказиб юборишидан афсусда эканлигини билдирди:
"Энди жавоб ўйинида захира ўриндиғида бўлолмайман, кийиниш хонасига кириб, жамоа билан гаплаша олмайман. Бу мен учун қийин, лекин ёрдамчиларим бунга тайёр бўлишади".
Эслатиб ўтамиз, "Реал" ва "Бенфика" ўртасидаги жавоб учрашуви "Сантьяго Бернабеу"да бўлиб ўтади. Моуриньюсиз лиссабонликлар Мадридда мўъжиза кўрсата олишадими?
