Эшитдик-да! Рўзиқул Бердиев "Насаф"ни тарк этиши мумкин
17 фев 15:30
Янгиликлар
Эшитдик-да! Рўзиқул Бердиев "Насаф"ни тарк этиши мумкин
Championat.asia сайти маълумотига кўра кўра, клубдаги муҳит ҳавас қиладиган даражада эмас. Ходимлар, футболчи ва мураббийлар бир нечта лагерга ажралиб қолган.
"Насаф" етакчилари Шароф Муҳитдинов ва Ислом Кенжабоев бошқа жамоаларга ўтиб кетишди. Бобир Абдихолиқов ҳам кетиш арафасида турибди. Клуб бош директори улар билан шартномани узайтирмагани мухлисларни ташвишга солгани аниқ. Масалан, Шароф Муҳитдинов деярли 2 ой давомида эркин агент мақомида юрди ва охири бошқа жамоага кетди.
Бугун бош мураббий Рўзиқул Бердиев ҳам жамоа лагерини тарк этган. Унинг "Насаф"даги кейинги тақдири ҳозирча номаълум бўлиб турибди.
Эслатиб ўтамиз, бир неча кун олдин Рўзиқул Бердиев сайтимизга интервью берган ва қуйидаги фикрни айтганди: "Агарда вазият яхши томонга ўнгланмаса ва янада қийинчиликлар ҳамда тушунарсиз ишлар давом этадиган бўлса, балки мен ҳам мураббийлик фаолиятимда танаффус олишни ўйлаб кўраман. Бошқа чора қолмаяпти. Лекин умид қиламанки, вазият бунгача бормайди. "Насаф" жамоасига бўлган садоқатим ва қаршилик мухлислар ҳурмати учун клуб раҳбариятининг кўплаб тушунарсиз ишларга сабр қилиб келяпман".
Ўхшаш янгиликлар
championat.asia
"Пахтакор" - Ўзбекистон Суперкубоги соҳиби! 
АПЛ. "Манчестер Юнайтед" "Этихад"да "Манчестер Сити"нинг ғалабали сериясини якунлаб берди
Ла Лига. Мадриднинг икки жамоаси беллашувида "Барселона" "ютиб кетди"
Пенальти бор эди! – Ўзбекистон Суперкубогидаги ҳакамлик ҳақида
Фикрлар
Қадимий бир ривоятга кўра, чумоли оғзида озгина сув билан ёнаётган ўрмон сари ошиқиб борарди. Уни тўхтатиб сўрашибди, нега ҳамма жон сақлаш учун ҳар ёққа ўзини олиб қочаётганда сен ёнғинга қараб бораяпсан? Шунда у жавоб қилибди; мен оғзимга сув олиб, оловни ўчиришга кетаяпман...
Насаф жамоасига оид хавотирлар ортиб бормоқда. Ўзбек футболига бефарқ бўлмаган ҳақиқий мухлислар бу жамоанинг ўзига хос чиройли, мафтункор ўйинларини севиб томоша қилиб келишади. Ёш иқтидорлар билан қувноқ футбол ўйнайдиган Насаф ташриф буюрганда мезбон жамоа мухлислариям мазза қилиб ҳужумкор футболдан баҳраманд бўлишади. Хуллас, ғалабасию - мағлубияти ўзига ярашиб турадиган ёқимтой жамоа бугунга келиб тарқалиб кетиш хавфи остида қолмоқда. Дастлаб клуб менеджери Кучеренко Насафда вазият яхшиланаётганлигини англатувчи баёнот билан чиққанди, орадан унчалик кўп вақт ўтмасдан жамоа етакчи футболчиси - Шароф Муҳитдинов жамоадан кетди. Рўзиқул Бердиев берган интервьюсидан кейин хавотирларим янада ортди. Клуб раҳбари ва бош мураббий икки хил маълумот бермоқда. Мухлислар қайси бирига ишониши керак? Вазият шуни кўрсатмоқдаки, Бердиев айтган гапларида
ҳақиқат бор. Шу инсоннинг хизматлари эвазига жамоа бутун бир механизм каби шаклланиб келаётганди. Агар шунақа етук мураббийлар штаби ва ажойиб жамоа водийда ёки пойтахтда бўлганида, уларнинг меҳнатлари қадрланиб, 5-6 йиллик шартномалар таклиф қилинарди. Аллақачон ОЧЛда натижа кўрсатган бўларди менимча. Нега ҳозирги раҳбарият ўз зиммасидаги вазифани тўлиқ адо эта олмаяпти? Кенжабоев, Муҳитдинов, Абдухолиқовларнинг жамоадан кетиб қолишига индамай қараб туриш керакми? Ёки улар шунчалик катта ойлик-маош талаб қилишмоқдами? Бу йигитлар ортидан бошқа яхши ёш футболчилар ҳам кетиб қолмаслигига ким кафолат беради? Академия деб ўзимизга тасалли беришга шошилманг. Ёш иқтидорлар катта жамоани совринлар учун тортиб кетиши учун тажрибали футболчилар маҳоратига муҳтож. Боз устига ёш насафчилар турли ёш тоифаларида терма жамоамиз аъзолари саналишади. Улар клуб шаънини ҳимоя қилсинми ёки терма жамоа йиғинларига домий чақирув олиб турсинми? Ёки Про лигада пайдо бўлган Олимпикка қўйиб юборилиши керакми? Рўзиқул Бердиевдек мард, фидойи мураббийлар бунақа вазиятга ташлаб қўйилмаслиги керак. Шу инсонга Ўзбекистоннинг хоҳлаган ёшдаги терма жамоаси топширилса, 2-3 йилда мукаммал таркиб билан натижалар кўрсатиб бера оладиган салоҳиятга эга. Муаммолар ечилмай қолиб, Насаф тарқалиб кетса, бундан ўзбек футболи анча зарар кўради. Ҳурматли севимли жамоамиз мухлислари сизларни клубимиз раҳбарлари билан учрашиб, аниқ мақсад ва вазифаларга ойдинлик киритиб олишга чақириб қоламан. Лоқайдлик қилиб ўтиришга вақт йўқ, кейин кеч бўлиши мумкин. Мен оддий бир мухлисман, севимли жамоамизга бефарқ эмаслигимни шу сўзларим билан изҳор қилмоқдаман. Балким бу ишим севимли жамоам Насафнинг муаммоларига ечим топишга йўл очиб бермас, раҳбариятгача етиб бормаслигиям мумкин. Ёки Насафни яхши хабарлар қарши олаётган бўлиб, юксак марралар сари бошлаб борар! Ҳар қандай ҳолдаям сенга мухлис бўлишда давом этаман НАСАФ !!!!!