Эшитдик-да! Ўзбекистонлик футболчи Таиланднинг 7 карра чемпиони сафига ўтишга яқин
08 ноя 2019 12:54
Янгиликлар

Эшитдик-да! Ўзбекистонлик футболчи Таиланднинг 7 карра чемпиони сафига ўтишга яқин

Ўзбекистон терма жамоаси ва "Металлург" клуби ҳимоячиси Акбар Исматуллаев легионерга айланиши мумкин.

Эшитишимизга қараганда Исматуллаевга Таиланднинг 7 карра чемпиони "Бурирам" клуби жиддий қизиқиш билдирмоқда. Якунланган мавсумда "Бурирам" Таиланд чемпионатида кумуш медалларга эга чиқди ва келгуси йил ОЧЛ плей-офф босқичида иштирок этиш ҳуқуқини қўлга киритди.

"Бурирам Юнайтед" футбол клуби 1970 йилда ташкил топган. Уй ўйинларини 32600 томошабинга мўлжалланган "Чанг Арена" стадионида ўтказади. Бугунги кунда жамоани черногориялик мураббий Божидар Бандович бошқариб келмоқда.

2012 йилда "Бурирам" сафида ўзбекистонлик Анвар Ражабов тўп тепган эди.

Акбар Исматуллаев 2009-2017 йилларда "Пахтакор" клубида ўйнаган, 2018 йилдан буён "Металлург" сафида фаолият олиб бормоқда. Ўзбекистон терма жамоаси сафида 5та ўйинда майдонга тушган.