"Селтик" (Шотландия) – "Реал Мадрид" (Испания) 0:3

Голлар: 0:1 – 56 Винисиус Жуниор, 0:2 – 60 Модрич, 0:3 – 77 Азар.

Селтик – Харт, Юранович, Картер-Викерс, Йенц, Тэйлор, Макгрегор, О`Райли (Муй, 72), Хатате (Тернбулл, 72), Якумакис (Фурухаси, 72), Жота (Хакшабанович, 82), Абада (Маэда, 46).

Реал Мадрид – Куртуа, Карвахаль, Алаба, Милитао (Рюдигер, 46), Менди, Модрич (Асенсио, 80), Кроос, Тчуамени (Камавинга, 71), Вальверде, Бензема (Азар, 30), Винисиус Жуниор (Родриго, 80).

Огоҳлантиришлар: Менди (10), Маэда (64).

МАТНЛИ ТРАНСЛЯЦИЯ

ЯНГИЛАШ

Учрашув якунланди! "Реал" турнирнинг янги мавсумини ғалаба билан бошлади.

90. Иккинчи бўлимга 2 дақиқа қўшиб берилди.

88. Асенсион Жо Хартнинг қучоғи тўпни совға қилди.

86. Куртуа ҳам ғалабага ҳиссасини қўшадиган ҳаракат амалга оширди.

82. Жота "Ливерпул"даги фамилиядоши каби ҳаракат қила олмади, натижада захирага олинди.

80. Ўзгаришлар: Винисиус ўрнига Родриго, Модрич ўрнига Асенсио майдонга туширилди.

77. ГООООООООООООООООООЛЛЛЛЛЛЛЛЛЛЛ!!! Иккита 7 си бор дақиқада 7-рақамли Азар рақиб дарвозасини ишғол қилмоқда.

75. "Реал"да стандарт вазият юзага келди.

Зерикарли футбол ўртасида Самарқанд манзараларини кўриш ёқимли...

70. Чуамени ўрнига унинг жўраси Камавинга майдонга тушмоқда.

69. Тони Кроос рақибларига тўпни олиб қўйиш бўйича ўқув марказида дарс ўта олишини кўрсатди.

64. Дайзен бироз аввал гол урган Модричга хизматлари учун "раҳмат" айтди, оқибатда ҳакам ҳам унинг "миннатдорчилиги"ни "тақдирлади".

60. ГООООООООООООООЛЛЛЛЛЛЛЛЛЛ!!! Модрич Азарнинг пасидан сўнг чап оёқда тепса бўладиган нуқтадан ўнг оёқда тўпни дарвозага жойлаб қўйди.

56. ГООООООООООООЛЛЛЛЛЛЛЛЛЛЛЛ!!! Ўтган йилги финални кўрганмисиз? Шунга ўхшаш гол урилди. Валверди автомобилларга жарима солса бўладиган тезликда олдинга борди ва ичкарига узатма берди, Вини эса ушбу вазиятни увол қилишни истамади.

54. Ўйин темпи кун давомида фойдаланилган мобил қурилмамнинг қуввати каби кўриниш олмоқда.

49. Азар ҳозирги паси орқали ҳамон асосий таркиб футболчиси эмаслигини исботлади.

47. "Селтик" иккинчи бўлимни хавфли ҳужум билан бошлади.

46. "Реал"да иккинчи мажбурий ўзгариш: Рюдигер Милитао ўрнига майдонга туширилди.

Танаффус.

45. Биринчи бўлимга 4 дақиқа қўшиб берилди.

43. Винисиус рақиб дарвозабони билан бирга-бир вазиятдан фойдалана олмади.

41. Азар рақиб дарвозасига озор етказишни истамади.

39. Крооснинг кроссидан сўнг ўйиндан ташқари ҳолат қайд этилди.

35. Карвахал тўп учун курашаётган Жота билан бирга ўз шеригининг ҳам тўпни эгаллашига йўл қўймади.

31. Азар майдонга тушганига бир дақиқа бўлмасдан енгил жароҳат олди.

30. Бензема жароҳат олди, унинг ўрнига жароҳатлар қироли — Азар майдонга туширилди.

"Реал"дан кимдир майдонга тушади, жароҳат олган Бензема майдонни тарк этса керак.

27. Крооснинг зарбасига бирооз аниқлик етишмади.

26. Милитао гол уриб, рақибни ҳисобда олдинга олиб чиқишига озгина қолди.

24. Бенземадан нафақат яхши ҳужумчи, балки яхши ҳимоячи чиқиши мумкинлигини исботлади.

21. Макгрегор Куртуа қўриқлаётган дарвоза тўсинини тўп билан "калтаклади".

19. Бенземанинг имкониятлари "Олтин тўп"ни олиши учун юқори, аммо унинг бўйи Алаба узатган тўпга етказадиган даражада юқори эмас.

16. "Селтик" футболчиси рақиб жарима майдонида йиқилди, бироқ қандай йиқилган бўлса, шундоқ ўрнидан кўтарилди.

13. Бўрондек олдинга югурган Абаданинг зарбаси шабада каби оҳиста йўналтирилди.

11. Бензема ва Модрич ҳозирги вазиятда чапақай бўлмаганига афсусланган бўлса керак.

10. Менди сариқ карточка олганидан хурсанд қиёфада кўринди.

8. "Реал" футболчилари майдон бўйлаб олапарнинг русча талқинидаги машғулот-ўйинини ижро этмоқда.

3. Федя Вальверди ўтган мавсум финалидаги пасини кўролмаганларга қайта ижро этиб бермоқчи эди, мезбон ҳимоячилари эса ўша лавҳани кўрганликлари аён бўлди, оқибатда, ҳужум бартараф этилди.

2. Иккинчи дақиқа мезбонлар иккинчи бурчак зарбасини ишлаб олди.

1. Мезбонлар 25 сония ичида ҳисобни очишига бир баҳя қолди, мадридликлар уйқусирамаслиги лозим.

1. Учрашув бошланди.

"Селтик" анъанавий оқ-яшил либосда ҳаракат қилса, "Реал Мадрид" қора рангли футболкада ўйнайди.

Жамоалар майдонга чиқиб келишмоқда.

Бугун шотландияликлар ҳам жиддий қаршидик кўрсатишини кутяпман, сабаби "Селтик" чемпионат бошида 9:0 ҳисобида ғалаба қозонди, қолаверса, яқин таъқибчиси "Глазго"га ҳам имконият қолдирмади.

Мана бу инсондан барчага салом.

Бу учрашув кўпчиликнинг диққат-марказида бўлмаслиги табиий, сабаби, бугун ПСЖ ва "Ювентус" ўртасидаги даҳшатли қарама-қаршилик кутиб турибди. Биз доим шу каби дербиларга ошно бўламиз, лекин барибир "Реал" чемпион бўлаверади.

Ассалому алайкум, ухламасам, эртага бошлиқдан ёки синф раҳбаридан гапнинг бувасини эшитаман деб, барибир музқаймоқдан ширин уйқусидан воз кечаётган футбол ишқибозлари! Бугун уйқудан-да чиройлироқ футбол гувоҳига айланишингизга тилакдошман. Умид қиламанки, кўзларингиз юмилиб, ўйн ярмида бизни ташлаб кетмайсиз.

ЕЧЛ. Бензема жароҳат олган ўйинда "Реал" "Селтик"ни йирик ҳисобда енгди