Kapadze Ildar Sakaevga ham master-klass o'tib beradi...
Tur "Oq-tepa" va "Olimpik" jamoalari o'rtasidagi uchrashuv bilan start oladi. O'tgan turda tajribali "Neftchi"ga har jabhada master-klass o'tib bergan Timur Kapadze boshchiligidagi yoshlar bugungi raqibiga ham jiddiy bosh og'rig'i bo'lishi turgan gap. 
Xabaringiz bor, "Olimpik" farg'onaliklar bilan o'yinda xotirijam holatda 3 ta gol urib, ishonchli g'alabani qo'lga kiritgan edi. "Oq-tepa" ham chempionatning asosiy favoritlaridan biriga 3 ta gol urdi, ammo so'nggi daqiqada xuddi shuncha o'tkazib ham yubordi. Ildar Sakaev jamoasi bugun ham 2-bo'limda konsentratsiyani tushirib yuboradigan bo'lsa, jiddiy tarzda jazolanadi. Chunki, "Olimpik" joriy mavsum 2-taymlarda eng ko'p gol urgan jamoa bo'lib turibdi.
Pro liga. 11-tur
12 iyun, shanba
OQ-TEPA – OLIMPIK
Hakamlar: Doston Mirzaraimov, Olimjon Abduvosilov, Sanjar Shoyusupov
Nazoratchi: Dmitriy Roman
Komissar: Baxtiyor Shirinov
"Jar" stadionida o'tkaziladigan o'yinni boshqaradigan Doston Mirzaraimov joriy mavsum har ikkala klub ishtirokidagi o'yinlarda ishlashga ulgurgan. Farg'onalik referi "Oq-tepa"ning 2, "Olimpik"ning 1 o'yinini boshqargan:
Pro liga (1-tur): "Oq-tepa" 1:2 "Buxoro"
Pro liga (5-tur): "Oq-tepa" 2:2 "Aral Samali"
Kubok (1-tur): Olimpik 5:0 "Zomin"
Eslatib o'tamiz, mazkur jamoalar o'rtasida 1-davrada o'tkazilgan o'yin "Olimpik"ning g'alabasi bilan yakun topgan edi.
"Buxoro" bor alamini "Sho'rtan"dan oladi...
O'tgan turda "Aral Samali"ga imkoniyatni boy berib qo'ygan "Sho'rtan" futbolchilari bugun G'ijduvonda "Buxoro" mehmoni bo'lishadi. Uchrashuv favoritini ajratib olish uchun jamoalarning turnir jadvalidagi o'rnidan tashqari to'plar nisbatigaham e'tibor qaratish lozim. G'uzor jamoasi ortda qolgan 9 turda raqiblari darvozasiga faqat 2 bor yo'l topishni uddalagan va o'z darvozasidan 10 barobar ko'proq to'p olib chiqqan. Bundan ortiq tarifga hojat bo'lmasa kerak. 10-turda "Olimpik" bilan o'yinda sensacion natija qayd etgan "Buxoro" bugun nisbatan kuchsizroq raqibini ayab o'tirmasligi aniq.
BUXORO – SHO'RTAN
Hakamlar: Rahimbek Karimov, Husniddin Bahodirov, Oybek Kallaxo'jaev
Nazoratchi: Ro'zim Davletmuradov
Komissar: Qudrat Madraimov
"Navro'z" o'yingohida o'tkaziladigan o'yinni boshqaradigan hakam joriy mavsum "Buxoro" ishtirokidagi bitta o'yinda ishlashga ulgurgan:
Pro liga (3-tur): "Olimpik" 0:1 "Buxoro"
Eslatib o'tamiz, mazkur jamoalar o'rtasida 1-davrada o'tkazilgan o'yin "Buxoro"ning g'alabasi bilan yakun topgan edi. O'shanda o'yin taqdirini Davron Isoqov tomonidan urilgan yagona gol hal qilgan edi.
"Xorazm" mavsumdagi 4-g'alabasini qo'lga kiritadimi?
10-turda G'uzordan g'alaba bilan qaytgan "Aral Samali" bu gal Xorazmga safar qiladi. Ushbu bahs tur doirasidagi durang qayd etilish ehtimoli eng yuqori bo'lgan o'yin. Ammo, baribir mezbon faktori va muxlislarning qo'llab-quvvatlashi tufayli "Xorazm" yakunda 3 ochko olsa kerak. Ma'lumot uchun, "Xorazm" joriy mavsum uy o'yinlarida "Neftchi" bilan birga eng yaxshi natijani qayd etib turibdi (4 o'yindan 3 g'alaba, 1 durang). Hozircha Aleksandr Ejov shogirdlarini mehmonda mag'lub qiladigan jamoa topilmayapti.
13 iyun, yakshanba
XORAZM – ARAL SAMALI
Hakamlar: Ilya Ilin, Artyom Kalinin, Ruslan Samandarov
Nazoratchi: Konstantin Smirnov
Komissar: Qudrat Madraimov
Eslatib o'tamiz, mazkur jamoalar o'rtasida 1-davrada o'tkazilgan voha derbisida durang qayd etilgan edi.
"Yangier" "yaralangan sher" qarshisiga chiqadi...
So'nggi 2 turni safarda o'tkazib, asosiy raqiblari "Buxoro" va "Olimpik"ga imkoniyatni boy bergan "Neftchi" ertaga "Yangier"ni qabul qiladi. Bu bahsda Sirdaryo jamoasining ahvoliga havas qilmagan bo'lardik. Chunki Toshkentdagi o'yindan keyin Ilhom Mo'minjonov ochiq va dangal gapirdi. Agar Farg'ona klubi bu gal ham muvaffaqiyatsizlikka erishsa, muxlislar Mo'minjonovni, Ilhom aka esa shogirdlarini, futbolchilar o'zlarini kechira olishmaydi. Ushbu jamoalar o'rtasida 1-davrada o'tkazilgan bahsga e'tibor qaratsak, "Neftchi" mehmonda 3ta to'p farqi bilan zafar quchganiga guvoh bo'lamiz. Bu gal ham kamida shuncha to'p kiritilsa kerak...
NEFTCHI – YANGIER
Hakamlar: Abdurashid Xudoyberganov, Rasuljon Fozilov, Maksim Nexochin
Nazoratchi: Oleg Dachev
Komissar: Shohruh Said.
