Баҳодир Аҳмедов: "Мезбон Кувайтга қарши ўйнаш осон бўлмайди, аммо мухлисларимизни хурсанд қилиш ниятидамиз"

"Барча жамоаларни кейинги босқичга чиққани билан табриклайман! Эртанги ўйинга келсак, устозимга қарши тўқнаш келаман. Бу мен учун шараф. Ўйлайманки, эртанги учрашув жуда чиройли кечади. Биз учун осон бўлмайди. Кувайт жуда яхши жамоа. Мазкур терма жамоа тактик мураббийга эга. Кувайт билан баҳсда мухлисларни хурсанд қиламиз деган умиддаман", – дея гап бошлади Аҳмедов.

- Мусобақа Кувайтда бўлиб ўтмоқда. Мезбонга қарши ўйнайсизлар. Ўйинчиларингиз босим ҳис этмаяптими?

- Мухлислар тўла залда ўйнаймиз. Бу бизга қўл келади. Мухлислар қўллаб-қувватлаши ва бундай атмосферада ўйнаш йигитларимизга фойда келтиради. Чнуки футзалчилар бундай атмосферада ўзини жуда яхши ҳис этишади. Биз меҳмонда мезбонга қарши майдонга тушамиз. Мезбон Кувайтга қарши ўйнаш осон бўлмайди, аммо мухлисларимизни хурсанд қилиш ниятидамиз.

- Ўзбекистон Осиё Кубогида 17 та гол урди. Кувайтга қарши ўйинда ҳам ҳужумкор ўйин намойиш қиласизларми ёки ҳимоявийми?

- Худо хоҳласа, Кувайтга қарши ҳам ҳужумкор ўйин кўрсатамиз. Бироқ 17 та гол урганимиз аллақачон тарихда қолди. Эртанги баҳс – энг асосий ўйинимиз. Чиройли ўйин намойиш қилиб, мухлисларимизни хурсанд қилишимиз керак.

- Кувайт терма жамоаси ҳақида нималарни биласизлар?

- Кувайт жамоасини ўрганиб чиқдик. Улар ҳам бизни ўрганиб чиқишган. Буни яхши биламан. Чунки ҳар бир жамоа кейинги рақибни ўрганиб чиқади. Шунга қарамасдан, мураббий бошқа тактикадан фойдаланиши мумкин. Шунинг учун биз бугун ўйлаган нарса эртага бўлмаслиги эҳтимоли бор.  

- Икки жамоа ҳам ушбу мусобақада фаворит. Бу ҳақида нима дея оласиз?

- 8 та жамоа ҳам фаворит. Чунки бу – футбол. Унда ҳамма нарса бўлиши мумкин. Кувайт, Таиланд, Япония, Тожикистон, Вьетнам... Омад келмай қолса, шу фаворитлар ҳам мағлуб бўлиши мумкин.

Эслатиб ўтамиз, "B" гуруҳижа юз фоизлик натижа кўрсатган Ўзбекистон МТЖнинг Кувайтга қарши учрашуви 4 октябрь куни Тошкент вақти билан 22:00 да старт олади.

Баҳодир Аҳмедов шогирдлари мазкур босқичдан муваффақиятли ўтишса, ярим финалда Индонезия ҳамда Япония жуфтлиги ғолибига билан рўбарў келишади.